Александр Якушев: "Humo Arena'нинг қурилиши бутун жаҳон спорти ривожи йўлида хизмат қилади"

"Humo Arena" муз саройининг қурилиши жаҳон спорти ва, хусусан, хоккей ҳамда фигурали учиш ривожига ҳисса қўшади. Шундай бўлса-да, бу фақат бошланиши, бундан кейин Ўзбекистонда муз майдонларини кўпайтириш керак. Kun.uz мухбири хоккей бўйича икки карра Олимпия чемпиони (1972, 1976), етти карра жаҳон ва Европа чемпиони Александр Якушевнинг сўзларига асосланиб, шу ҳақида хабар берди.

"Хоккей спорт турининг катта ёшли вакили сифатида ўзбекистонликларни бундай ажойиб муз саройининг очилиши билан табриклайман. Зеро "Humo Arena"нинг очилиши нафақат ўзбек спорти, жумладан, хоккей ва фигурали учиш спорт турларининг ривожланишига, балки бутун жаҳон спорти, хоккейи учун фойда келтиради, чунки бундай даражадаги ҳар бир арена спорт ривожи учун кучли туртки беради", - деди у.

Александр Якушевнинг сўзларига кўра, ушбу аренанинг қурилиши Ўзбекистонда хоккейни ривожлантириш учун жуда яхши замин яратади, асосийси - келгусида бундай ва бундан кичикроқ муз иншоотларини кўпайтириш.

"Humo Arena спорт комплекси жуда зўр, албатта, лекин бундан кейин айнан машғулотлар ўтказиладиган кичикроқ муз майдонларини кўпайтириш керак бўлади. Мисол учун, Москвада қанча муз майдони қурмайлик, барибир уларнинг камлиги сезилади. Шундай экан, биргина муз саройи билан қутулмайсиз, ҳали машғулотлар ўтказилувчи кўп муз майдонларини ташкил қилишингиз керак бўлади", - дейди Якушев.

Шу ўринда хоккей афсонаси Ўзбекистонда хоккейни ривожлантириш учун тажриба борлигини қайд этиб, "Бинокор" жамоасини тилга олди.

"Хоккейга келсак, юқорида айтганимдек унинг ривожи учун замин яратилди, тажриба бор - совет даврида Ўзбекистонда "Бинокор" жамоаси бўлган, совет хоккейининг биринчи лигасида ўйнаган. Humo Arena'нинг қурилиши Ўзбекистонда хоккейни ривожлантириш, унинг базасида хоккей жамоаларини шакллантириш, келгусида бу жамоаларнинг КХЛ или АХЛда ўйнаши учун замин ясайди", - таъкидлади у.

Таъкидлаш жоизки, Александр Якушев 15 март куни бўлиб ўтган "Humo Arena" очилиш маросимида иштирок этиб, хоккей афсонаси Павел Буре, Виталий Прохоров, Алишер Азимов ва Баҳодир Ғофуровлар билан бирга Ўзбекистоннинг ёшлар жамоасига қарши рамзий ўйинда иштирок этди. Ўйинда 2:2 ҳисоби қайд этилди.

Маълумот учун: Александр Якушев - икки карра Олимпия чемпиони (1972, 1976), етти карра жаҳон ва Европа чемпиони (1967, 1969, 1970, 1973-75, 1979). 1975 йилда у энг яхши ҳужумчи сифатида эътироф этилган. 1974 ва 1975 йилларда жаҳон чемпионатининг рамзий терма жамоаси сафига қўшилган. Олимпия ўйинлари, жаҳон ва Европа чемпионатларида 90 матч ўйнаб, 64 шайбани дарвозага киритган. СССР терма жамоасида жами 146 шайба киритган. СССРнинг уч карра чемпиони (1967, 1969, 1976). 1970 ва 1971 йилларда СССР Кубоги эгаси. Уч маротаба СССР чемпионатининг энг яхши снайпери деб тан олинган (1968/1969, 1973/1974, 1975/1976). 1965, 1967-1971, 1973-1977, 1979 йилларда СССРнинг энг яхши хоккейчилари рўйхатига киритилган. Всеволод Бобров Клуби аъзоси. 2003 йилда Халқаро хоккей федерациясининг Шон-шарафлар залига киритилган. 2018 йилда Хоккей шон-шуҳрати залига киритилган.