«ЎФАни танқид қилиш ниятида эмасдим». Канчельскис водий дербисидан кейинги сўзлари учун узр сўради

«Навбаҳор» бош мураббийи Андрей Канчельскис Суперлиганинг 1-туридаги «Қўқон-1912»га қарши ўйиндан кейин ЎФА ҳақида билдирган фикрларига изоҳ берди, деб хабар бермоқда ПФЛ матбуот хизмати.

Эслатиб ўтамиз, 10 мартдаги ўйин Намангандаги стадион тайёр ҳолатда бўлмагани туфайли Тошкентда бўлиб ўтган ва унда 1:1 ҳисоби қайд этилганди. «Навбаҳор» бош мураббийи ўйиндан кейинги матбуот анжуманида қуйидагича сўз юритганди.

«Бугун стадионимиз тайёр бўлмагани сабабли Тошкентда ўйнашга мажбур бўлдик. Биз расман мезбон эдик, лекин тезроқ Наманганда ўйнашни бошласак, яхши бўларди.

Биз мавсум бошланишини интизорлик билан кутдик. Ўзингиз кўрдингиз, ҳар хил ўзгаришлар қилишди. Тўғриси, улар нима қилмоқчи бўлишаётганини умуман тушунмаяпман. Энди 2-турни яна 20 кундан кейин ўйнаймиз. Юқорида айтганимдек, футбол федерациясидагилар нима қилмоқчи эканликларини тушунмаяпман. Бундай ғалати ҳолатга биринчи марта тўқнаш келяпман ва бу менга эриш туюлмоқда. Лекин нима ҳам дердим, Ўзбекистонда яшаяпмизми, демак сизнинг қонунларингиз билан яшаймиз», – деганди Андрей Канчельскис.

ПФЛ хабарида айтилишича, ташкилот россиялик мутахассиснинг бу фикрларини «босиқлик билан қабул қилди ҳамда ишни ЎФА қўмиталарига оширишга шошилмади». Аксинча, лига вакиллари Канчельскис билан бир неча кундан сўнг боғланиб, мазкур масала юзасидан изоҳ сўраган.

«Биласизми, 1-тур ўйинини мезбон бўла туриб, ўз майдонимизда ўтказмаганимиз кайфиятимизни бироз бузди. Қолаверса, чемпионатни ғалаба билан бошламоқчи эдик. Лекин якунда дуранг ўйнадик. Бунинг ортидан матбуот анжумани вақтида кайфиятим жойида эмасди. Ҳаяжон сабаб фикрларимни бироз қўпол тарзда баён этиб юбордим. Аслида эса айнан кимнидир ёки ЎФАни танқид қилиш ниятида эмас эдим. Қизишиб айтган сўзларим учун футбол жамоатчилигидан узр сўрайман», — деган Канчельскис.

Таъкидланишича, ПФЛ ўз майдонида улкан ўзгаришлар қилаётган «Навбаҳор»нинг меҳнатларини қадрлайди. «Шунинг учун ҳам мазкур жамоага ўз уй учрашувларини вақтинчалик исталган стадионда ўтказиш имконияти тақдим этилди», – дейилади хабарда.ПФЛнинг тушунтиришича, «Навбаҳор» стадионининг янги кўриниши қачон тайёр бўлиши ҳам, мазкур жамоа айнан қайси стадионда ўйнашни ихтиёр этиши ҳам ЎзПФЛ ёки ЎФАнинг қўлида эмас.

«Бундан келиб чиқадики, бош мураббий томонидан билдирилган кескин фикрлар кўпроқ жамоа раҳбариятига тегишлидир», – дея қайд этилган расмий билдиришда.

«Айни пайтда ПФЛ барча майдонлар идеал ҳолатда бўлишини талаб этмоқда ва бу жуда тўғри фикр. Ушбу ташаббусни тўла қўллаб-қувватлайман. Европада, хусусан, Англияда фаолият олиб борган киши сифатида айтишим мумкинки, яхши ҳолатдаги майдонда футболчи ҳам роҳатланиб тўп суради. Шунинг учун уй стадионимиз имкон қадар тез муддат ичида тайёр бўлишини ҳамда жамоамиз ишқибозларини чиройли ғалабалар билан хушнуд этишини истайман», - деб фикрида давом этган «Навбаҳор» бош мураббийи.

ЎзПФЛ Канчельскис томонидан билдирилган мазкур фикрларни қўллаб-қувватлашини билдирган. Шу билан бирга, ташкилот бир йил муқаддам Суперлиганинг бир қатор клублари айнан «Навбаҳор» стадиони масаласида қийинчиликка дуч келгани, бироқ ПФЛ ўйинлар наманганлик мухлислар кўз ўнгида ўтишини талаб қилганини эслатиб ўтган.

Хабарда айтилишича, «клуб раҳбарияти бундан тўғри хулоса чиқариб, вазиятни яхшилаш йўлидан юраётгани ёқимли ҳолат. Таъмирлаш ишлари якунига қадар эса клуб мутасаддилари европалик мураббийга ҳолатни тўлиқ тушунтириб беришлари керак бўлади».

ПФЛнинг қўшимча қилишича, ташкилот томонидан майдони айни пайтда учрашувларни қабул қилишга тайёр бўлмаган жамоаларга стадион танлаш ҳуқуқи тақдим этилган. Шу боисдан «Навбаҳор» — «Қўқон-1912» учрашуви Тошкентдаги ТТЙМИ стадионида бўлиб ўтди. Боиси, Намангандаги стадион ҳам, «Қўқон-1912» уй стадиони ҳам айни дамда янги мавсумга тўлиқ тайёр эмас эди.

Эслатиб ўтамиз, наманганликлар ўз уй учрашувини Фарғонадаги «Истиқлол» стадионида ўтказиш ниятида эдилар. Якунда эса «Навбаҳор» «Истиқлол» стадиони эмас, балки ТТЙМИ стадиони билан келиша олди ва натижада «лочинлар» илк тур ўйинини Тошкентда ўтказишди.

ПФЛнинг таъкидлашича, «Навбаҳор» ва «Истиқлол» стадиони ўртасидаги келишув нима сабабдан амалга ошмагани юзасидан ҳам «Навбаҳор» футбол клуби изоҳ бериши керак, ПФЛ эмас.

«ЎзПФЛ Канчельскис томонидан ҳаяжон сабаб айтилган фикрларга кейинчалик тузатиш киритилди, деб ҳисоблайди. Шунингдек, таъмирлаш ишлари давом этаётган бир қатор стадионларда иш якунига етгунига қадар футбол мухлислари ва ОАВ вакилларидан масалага босиқлик билан ёндошишни сўрайди.

Яна бир неча кунлардан сўнг Суперлиганинг бир қатор стадионларида ижобий ўзгаришлар бўлаётганига гувоҳ бўлиш мумкин. Шу билан биргаликда ЎФА ҳамда ЎзПФЛ асоссиз танқид қилингани ҳолатида футболчи ёки мураббийлар ишини Тартиб-интизом ҳамда этика масалалари бўйича жавобгар қўмиталар кўриб чиқишини эслатиб ўтамиз», – дея якунланади ПФЛнинг мазкур ҳолатга нисбатан билдирган муносабати.

Маълумот учун, «Навбаҳор» 2-турда «Локомотив» (30 март), 4-турда «Насаф« (12 апрель) меҳмони бўлади; 3-турни эса 6 апрель куни ўз майдонида «Бунёдкор»га қарши ўтказиши белгиланган.