Тонусдаги «Пахтакор», Сурхонга катта футбол қайтиши ва «дуранглар эпидемияси» - Суперлигада 1-тур якунлари

16 март куни футбол бўйича Ўзбекистон чемпионатининг 1-тур ўйинлари якунланди. Тошкентнинг икки клуби «Пахтакор» ва «Локомотив» Чемпионлар Лигасида иштирок этаётгани сабабли бу жамоалар иштирокидаги турни якунлаб берган ўйин 16 мартга сурилганди. Tribuna.uz Суперлига 1-турининг диққатга сазовор воқеаларини эслаймиз.

Қайтиш

«Сурхон» 15 йилдан сўнг юқори дивизионга қайтди. Охирги марта 2004 йилда Олий Лигада ўйнаган «Сурхон»нинг яна юқори дивизионда ўйнаши Сурхондарёдаги мухлислар учун катта хушхабар бўлди. Янги мавсум олдидан бир неча марта мураббийни ўзгартирган сурхонликлар охир-оқибат янги мавсумни Андрей Микляев билан бошлашга қарор қилишди. Ўтган мавсумдан буён «Сурхон»ни Игорь Шквирин, Дилшод Нуралиев, Илҳом Мўминжонов ва Анвар Солиев каби мураббийлар ҳам қўлга олишганди. Клуб кўплаб яхши футболчилар билан шартнома имзолади ва курашувчан жамоага айланишга уринмоқда.

Узоқ йиллик қайтишдан кейинги илк ўйинни «Сурхон» ўз майдонида «Металлург»га қарши ўтказди. Аввалига Шерзод Ҳакимовнинг голи эвазига ҳисобда олдинга чиқиб олган мезбонлар ғалабани ушлаб қола олишмади. 89-дақиқада Аббос Отахонов бекободликларга бир очко келтирган голга муаллифлик қилди.

Янгиланган «Насаф»

1-турнинг қизиқарли ўйинларидан бири Самарқандда ўтказилди. Худди «Сурхон» каби тушунарсиз тарзда юқори дивизионга қайтган «Динамо» Қаршининг «Насаф» клубини қабул қилди. Бу ўйинда мухлислар яна янгиланган «Насаф» ўйинига гувоҳ бўлишди. Янгиланган «Насаф» ибораси охирги йилларда кўп ишлатилди. Чунки, «Насаф» етакчилари ҳар мавсум якунида жамоани тарк этиши одатга айланди. Бироқ Рўзиқул Бердиев бор имкониятдан фойдаланиб, янги жамоа тузгани кўринди.

Бу галги «Насаф» чемпионлик учун курашиб, иккинчи ўринни олган, Арвеладзенинг «Пахтакор»ини 4:0 ҳисобида енгган «Насаф»дан фарқ қилади. Унда жамоада бошқа клублардан келган футболчилар ҳам кўп эди. Ҳозирги «Насаф» асосан академия футболчиларидан таркиб топган. Бердиев чемпионлик учун курашадиган жамоаси ўтган мавсумда ўртамиёнага айланиб қолганидан жаҳли чиққанини Самарқанддаги ўйиндан сўнг «Бизда чемпионлик учун курашиш имконият йўқ», деганидан билиш мумкин.

Шундай бўлса-да, мураббий Қаршида янги футболчиларни кашф қила олди. Ғолиб Ғайбуллаев, Умид Эргашев ва Дилшод Саитов эндиликда асосий таркиб футболчиларига айланишган. Ўтган мавсумдаги жамоа етакчилари Бобур Абдухолиқов, Шароф Муҳиддинов ва Умар Эшмуродов бу мавсум янги даражага кўтарилишини кутсак бўлади.

Хунук якунланган водий дербиси...

1-турнинг марказий ўйинларидан бўлган «Навбаҳор» - «Қўқон-1912» учрашуви водийдаги стадионлар мавсумга тайёр бўлмагани сабаб Тошкентда ўтказилди. Пойтахтаги Темирйўл муҳандислари институти стадионида кечган ўйин 1:1 ҳисобида якунланди. Бу ўйиннинг энг диққатга сазовор воқеаси у тугаганидан сўнг содир бўлди. «Навбаҳор» мухлислари кутилмаганда майдондан чиқиб кетаётган «Қўқон-1912» футболчиларига турли буюмлар улоқтиришди. Катта эҳтимол билан «Қўқон-1912» футболчиларидан бирортаси «Навбаҳор» мухлисларига қарата провакацион ҳаракатни амалга оширган ва бу мухлисларга ёқмаган.

Фожиа...

«Навбаҳор» - «Қўқон-1912» ўйинидан кейин бутун мамлакатдаги мухлисларни қайғуга солган воқеа содир бўлди. Ўйинни кўриш учун Тошкентга бориб, ортга қайтаётган «Навбаҳор» мухлислари Тўрақўрғон тумани ҳудудида автоҳалокатга учрашган. Қарама-қарши йўналишдан келаётган «Дамас» билан тўқнашиб кетган «Нексия»да «Навбаҳор»нинг 5 нафар мухлиси бўлган. Улардан икки нафари ҳалок бўлган. Бу ҳолат барчани қайғуга солди. «Пахтакор» бош мураббийи Шота Арвеладзе «Локомотив»га қарши ўйиндан кейин ўтказилган матбуот анжуманидаги сўзини айнан ҳалок бўлган «Навбаҳор» мухлислари оиласига ҳамдардлик билдириш билан бошлади.

Жуда кучли «Пахтакор»

Тошкентнинг «Пахтакор» клуби мавсумни жуда яхши бошлади. Арвеладзе жамоаси Чемпионлар Лигасида 4та ўйинда қатнашди ва уларнинг 3тасида ғалаба қозонди. Халқаро майдондаги ажойиб старт «Пахтакор»нинг чемпионатни ҳам яхши бошлашига ишора қилаётганди ва барчасини майдонда кўриш қолганди, холос. 1-турни амалдаги чемпион «Локомотив»га қарши бошлаган «Пахтакор» мавсумдаги энг яхши ўйинини ўтказди. Дерби тақдирини 10 дақиқа ичида ҳал қилиб қўйгани Арвеладзе жамоасининг ақлли ўйин кўрсатганини англатади.

«Локомотив» билан ўйинда «Пахтакор» бу йил Ўзбекистон чемпионатида ғолиб бўлиш учун ким асосий даъвогар эканини кўрсатиб қўйди. Ўтган йиллар ҳар хил легионерлар сотиб олишга эътибор берган «Пахтакор» керакли натижага эриша олмади ва бу сиёсат хато эканини англади. Шу сабаб жамоа бу йил кучли маҳаллий футболчиларни ўз сафига қўшиб олишга эътибор қаратди. Достон Ҳамдамов, Марат Бимаев, Жавоҳир Сиддиқов ва яна кўплаб мамлакатнинг кўзга кўринган футболчилари эндиликда ўзбек футболи байроқдори сафида ҳаракат қилишмоқда. Бу трансферлар ўзини оқлаганини эса натижалар ва ўйин кўрсатиб турибди. «Пахтакор» ҳозирдан ўзининг тонусига чиқиб бораётгани футболимизнинг ютуғи, бизнингча.

«Дуранглар эпидемияси» ортидан ғалабалар

Суперлига 1-турининг дастлабки 5та ўйини дуранг натижа билан якунлангани ҳайратланарли бўлди. «Қизилқум» – «Андижон» (1:1), «Динамо» – «Насаф» (1:1), «Сурхон» – «Металлург» (1:1), ОКМК – «Бухоро» (0:0), «Навбаҳор» – «Қўқон-1912» (1:1) ўйинларида ғолиб аниқланмади. Бироқ турнинг охирги икки ўйинида ғалабалар кузатилди. «Сўғдиёна» охирги дақиқаларда «Бунёдкор»ни енгган бўлса (2:1), «Пахтакор» амалдаги чемпион «Локомотив»га ҳеч қандай имконият қолдирмади (3:1).

Тур қаҳрамони

1-турнинг энг яхши футболчиси, шубҳасиз, Драган Черан бўлди. «Пахтакор»да ўзининг янги қирраларини намойиш қилаётган сербиялик футболчи эндиликда марказий ҳужумчи сифатида эмас, бироз орқароқда ўйнамоқда. Арвеладзе унинг аниқ тўп узатиш қобилиятидан унумли фойдаланмоқда. Чераннинг «Локомотив» дарвозасига урган иккинчи голи шунчаки шедевр бўлди. Ҳозирдан айтишимиз мумкинки, бу мавсумнинг энг чиройли голларидан бири бўлади.

Турнир жадвалидаги ҳолат