NASA Камчаткада йирик метеорит портлаши юз бергани ҳақида маълум қилди

2018 йил декабрда Россиянинг Камчатка яримороли соҳиллари яқинида охирги бир неча йил ичидаги энг йирик метеорит портлаши юз берган. Бу портлаш аҳоли пунктларидан анча узоқда юз бергани сабабли коинотдан келган “меҳмон” деярли пайқалмаган. Бу ҳақда NASA’нинг планетар ҳимоя ходими Линдли Жонсонга иқтибос келтирган ҳолда BBC хабар берди.  

Метеорит атмосферада барбод бўлиши вақтида Хиросимага ташланган атом бомбасидан 10 марта кучлироқ энергия ажратган. Жонсоннинг тушунтиришича, бундай йирик метеоритлар Ерга 100 йил ичида 2-3 мартадан кўп тушмайди.

NASA’да таъкидланишича, метеорит атмосферага 18 декабрь туш вақтида сониясига 32 километр тезлик билан 7 даражали бурчак остида кирган. У сайёрамиз сиртидан 25,6 километр баландликда парчаланиб кетган. Портлаш кучи тротил эквивалентида 173 килотоннани ташкил қилган.  

Бу портлашда 2013 йилда Ерга тушган Челябинск метеорити энергиясининг 40 фоизига тенг энергия ажраган. Бу сафарги метеорит қулаши Беринг денгизи устида юз бергани сабабли метеорит эътиборсиз қолган.

“Бизнинг ҳимоя арсеналимиздаги яна бир нарса – сайёрамизда сувнинг кўплигидир”, деб айтган NASA менежери Келли Фаст.

Метеоритнинг атмосферада портлаганини АҚШ ҳарбий сунъий йўлдошлари қайд қилган, шундан кейин Пентагон бу ҳақидаги маълумотни NASA’га берган. Шунингдек, метеоритнинг қулашини Япониянинг Himawari сунъий йўлдоши ҳам қайд қилган.

Охирги йилларда энг йирик метеорит қулаши Россиянинг Челябинск вилоятида қайд қилинган. Само жисми 2013 йил 15 февралда Ер билан тўқнашган. Астероид ўлчами кўндалангига 19,8 метрни ташкил қилган. Метеоритнинг атмосферада парчаланишида тортил эквивалентида 440 килотонналик зарба тўлқинлари ҳосил бўлган. 1,5 минг киши жароҳат олган. 16 октябрда метеоритнинг 600 кгга яқин энг катта бўлаги Чебаркуль кўли тубидан чиқарилган.

2005 йилда АҚШ конгресси NASA мутахассисларига 2020 йилгача Ер билан тўқнашиши мумкин бўлган ва диаметри 140 метрдан каттароқ 90 фоиз астероидларни аниқлашни топширган. Бундай само жисмлари катта ҳудудларга жиддий зарар етказиши мумкин. Бироқ олимларнинг фикрича, конгресснинг топшириғини бажаришга яна 30 йилча керак бўлади.