Роналду АҚШда ҳибсга олиниши эҳтимоли туфайли «Ювентус» ёзги турнесини Осиёга кўчиради

«Ювентус» мавсумолди турнесини АҚШда эмас, Осиёда ўтказади, деб хабар бермоқда The New York Times.

Нашр маълумотига кўра, Халқаро чемпионлар кубоги ташкилотчилари бу йилги мусобақа иштирокчилари сафига «бьянконери»ни киритмасликка қарор қилишган, бунга жамоа ҳужумчиси Криштиану Роналду устидан АҚШда сентябрдан буён тергов кетаётгани сабаб бўлган. Ташкилотчилар португалиялик юлдуз Қўшма Штатлар ҳудудига кирган тақдирда эҳтиёт чораси сифатида ҳибсга олиниши эҳтимоли йўқ эмас, деб ҳисоблашмоқда.

Турин клуби кўп йиллардан буён «Relevant Sports» компанияси томонидан ташкил этиб келинадиган Халқаро чемпионлар кубогида иштирок этиб келади. Аммо бу йил клуб Хитой ва Сингапурда йиғин ўтказиши, уларда «Тоттенҳэм» ва «Манчестер Юнайтед»га қарши ўртоқлик ўйинларида майдонга тушиши кутилмоқда.

Қайд этиш керак, ХЧК расмий сайтида 6 март куни чиққан хабарда «Ювентус» шу йил ёзда турнирда иштирок этиши тасдиқланган эди.

Эслатиб ўтамиз, 2018 йил кузида америкалик модель Кэтрин Майорга Роналду устидан даъво билан чиққан ва Криштиану 2009 йил июнида унга нисбатан зўравонлик қилганини арз қилганди. Ҳужумчи бу айбловларни буткул рад этиб, модель шу йўл билан оммага танилишни истаётганини айтиб келади. «Ҳуқуқшуносларимнинг ишончи комил, шу жумладан, ўзимнинг ҳам. Ҳақиқат, албатта, юзага чиқади», - деганди у.

Бир ой олдин EA Sports компанияси ҳеч қандай изоҳларсиз Роналдуни FIFA19 муқовасидан олиб ташлаган эди.