«Жунглида фақат битта қирол бўлади» – Ҳабиб Нурмагомедов Макгрегорнинг кетиши борасида ҳазил қилди

UFC бўйича собиқ жаҳон чемпиони Конор Макгрегор катта спортдан кетганини эълон қилди. Унинг баёноти ижтимоий тармоқларда фаол муҳокама қилинмоқда. Макгрегорни чемпионлик камаридан маҳрум қилган доғистонлик жангчи Ҳабиб Нурмагомедов бу борада ҳазил қилди.

«Жунглида фақат битта қирол бўлади. Фақат битта»,- деб ёзди Нурмагомедов твиттердаги саҳифасида. У постга қўлида бир рақамини кўрсатган суратини илова қилди. Бу билан Нурмагомедов ўзининг UFC’даги якка ҳукмронлигига ишора қилди.

Нурмагомедов жунгли билан боғлик бу гапни олдин ҳам ишлатган. Масалан, Конор Макгрегорни мағлуб этгач, Нурмагомедов енгилмас боксчи Флойд Майвезерни жангга чорлар экан, «Жунглида битта қирол бўлади», деб айтганди.

Ҳабиб Нурмагомедов ва Конор Макгрегор 2018 йил 6 октябрь куни АҚШнинг Невада штатида ташкиллаштирилган UFC229 жанг кечасининг марказий баҳсида тўқнаш келган ва енгил вазн тоифасидаги чемпионлик камари учун кечган жангнинг 4-дақиқасида Нурмагомедов бўғиш усулини қўллаб, ғолиб бўлганди. Жанг тугаши билан доғистонлик спортчи ирландиялик рақибининг жамоаси вакилларига ташлангани катта можарога сабаб бўлганди. Бу жанг UFC тарихидаги энг машҳур ва энг сердаромади бўлиб тарихда қолган.