«Ўзбекэнерго»нинг иккита банкдаги улуши сотувга қўйилади

Ўзбекистон Республикаси президенти “Ўзбекистон Республикасида электр энергетика тармоғини янада ривожлантириш ва ислоҳ қилиш стратегияси тўғрисида”ги қарорни имзолаганди. Ҳужжат билан «Ўзбекэнерго» қайта ташкил этилади.

Хусусан: 

а) иссиқлик электр станциялари ҳамда электр ва иссиқлик энергияси ишлаб чиқарувчи электр марказларини бошқарувчи “Иссиқлик электр станциялари” акциядорлик жамияти;

б) “Ўзбекэнерго” АЖнинг тугатилаётган “Ўзэлектртармоқ” УК ва “Энергосотиш” филиали негизида “Ўзбекистон миллий электр тармоқлари” акциядорлик жамияти:

в) электр энергияни якуний истеъмолчиларга тақсимловчи ва сотувчи ҳудудий электр тармоқлари корхоналарини бошқаришни амалга оширувчи “Ҳудудий электр тармоқлари” акциядорлик жамияти ташкил этилади;

Шунингдек, “Ўзбекэнерго” АЖ ва унинг таркибига кирувчи ташкилотларнинг соҳага оид бўлмаган ва фойдаланилмаётган активлари ва улушларини кейинчалик 2019-2021 йиллар давомида белгиланган тартибда сотиш мақсадида баланс қиймати бўйича Ўзбекистон Республикаси Давлат активларини бошқариш агентлигига берилади.

Ушбу компаниялар орасида иккита банк бор - "Ўзсаноатқурилишбанк" ва "Ипотека банк". Ҳар иккисида ҳам "Ўзбекэнерго"нинг улуши 1,41 фоизни ташкил қилади. Улушлар 2019 йилда сотилиши керак.

Сотувга қўйиладиган бошқа активлар орасида "Бухоро деҳқон бозори" (0,07%), "Чўл паррандаси" (100%), "Навоий савдо комплекси" (5,4% ва 1,75%), "Қурилиш-лизинг" (1,76%) ва бошқалардаги улушлар бор.

Яна 59та актив - бино ва иншоотлардир. Масалан, электр энергияси ҳисоблагичларини ишлаб чиқарувчи завод, "Фитнес маркази" спорт комплекси, "Фарҳод" ҳайкали биноси, омборхоналар, ошхоналар ва бошқа кўплаб нарсалар.