Европада «мидвик». Бугун «Барселона» ва «МЮ»да, эртага «Реал»да муҳим ўйинлар

Одатда Европанинг «кучли бешлик» чемпионатларида ўйинлар дам олиш кунларида ўтказилади. Бироқ баъзан ҳафта ўртасида ҳам ўйинлар бўлади. Масалан, кубок ёки Чемпионлар Лигаси ўйинлари сабаб. Баъзан миллий жамоалар ўртасидаги ўйинлар туфайли юзага келган танаффуслар шу тариқа тўлдирилади. Хуллас, бу ҳафта «кучли бешлик»да мидвик бўлади ва унда мухлислар қизиқарли ўйинларга гувоҳ бўлишади.

ЛА ЛИГА
«Вильярреал» - «Барселона»
Ўйин вақти: 2 апрель, 00:30
«Барселона» чемпионат якунланишига 9та ўйин қолганида иккинчи ўриндаги «Атлетико»дан 10 очко олдинда бормоқда. Учинчи ўриндаги «Реал» эса каталонияликлардан 12 очко ортда қолган. Месси ва жамоадошлари учун мураккаб ўйинлар кўп эмас ва улардан бири айнан «Вильярреал»га қарши кечади. «Сариқ сувости кемаси» «хавфли ҳудуд»га «чўкиб кетмаслик» учун ҳар қандай рақибни енгиши талаб этилади.

«Вильярреал» ҳозирда 29 очко билан 17-ўринда бормоқда. Таққослаш учун, «хавфли ҳудуд» «пешқадами» «Сельта» ҳисобида 28 очко бор. «Барселона» эса ҳозир даҳшатли формада. Ўзи қатнашаётган учта мусобақада ҳам ғолиблик учун асосий фаворит ҳисобланган «Барса» етакчиси Лионель Месси ҳам супер ҳолатда. Ла Лигада 31та гол урган Месси барча мусобақалардаги голлари сонини 41тага етказишга улгурди. «Вильярреал» бош мураббийи Хавьер Кальехо бу ўйинда футболчиларига жарима майдончаси ичида қўполлик қилса ҳам, майдонча атрофида қоида бузмаслик кераклигини тайинласа керак. Чунки, Месси ва жарима зарбалари ҳозирда «бир-бирларини яримта сўзда тушунишмоқда».

«Атлетико» - «Жирона»
Ўйин вақти: 2 апрель, 22:30
«Жирона» еврокубоклар учун ҳам курашмаяпти, лигадан тушиб кетишдан ҳам суғурталанган. Бу жамоа мухлислари учун кейинги ўйинларда битта интрига бор: Стуани яна нечта гол ураркин? Уругвайлик футболчи 17та гол билан тўпурарлик пойгасида Месси ва Суаресдан кейин учинчи бўлиб турибди.

Каталония шарафини ҳимоя қиладиган «Жирона» бу баҳсда ҳамшаҳари «Барселона»га ёрдам бериб юбориши ҳам мумкин. Агар Стуани ва шериклари «Атлетико»дан очко олиб қўйишса, бу ҳам «Барселона», ҳам «Реал» учун фойдали бўлади. «Барселона» таъқибчи билан фарқ ошганидан, «Реал» эса иккинчи ўринга чиқиб олиш имкони пайдо бўлганидан хурсанд бўлиши мумкин.

«Атлетико» ҳозир тушкун кайфиятда дейиш мумкин. «Ювентус» билан ўйинда иккита гол устунлигини қўлдан чиқарган «Атлетико» футболчилари учун мавсум . муваффақиятсиз якунланмоқда. Ҳатто доим қизиққон Симеоне ҳам ўша ўйиндан сўнг жим қолгани жамоа ҳолатидан далолат беради. «Атлетико» эндиликда бутун эътиборни чемпионатга қаратган. Симеоне голни нишонлашнинг турли усулларини намойиш этиб, танасининг «қанчалик кўркам эканини» достон қилмасдан, эътиборини ўйинга қаратса «Атлетико» охирги турларгача чемпиондик пойгасида қолиши мумкин.

«Валенсия» - «Реал»
Ўйин вақти: 3 апрель, 00:30
«Реал» Зидан келганидан буён фақат ғалаба қозонмоқда. Бироқ ҳар икки ўйинда ҳам жамоа қийналди. Бу эса муаммо чиндан жиддий бўлганини кўрсатади. Айни пайтда фақат Ла Лигада иштирокини давом эттираётган «Реал» кейинги мавсумга тайёргарликни бошлаб юборган. Зидан чемпионликдан умидини узган деб бўлмайди, лекин мураббий барча футболчиларни синаб кўраётгани қолган ўйинлар қайсидир маънода мавсумолди тайёргарлигига айланиб кетганини англатади. «Уэска» билан ўйинда Лука Зидан ва Браим Диас каби ёш футболчилар майдонга тушгани бежизга эмас.

«Валенсия»да эса вазият бошқачароқ. «Кўршапалаклар» Чемпионлар Лигаси йўлланмасидан умид узишмаган. Айни дамда «Хетафе» эгаллаб турган 4-поғона учун «Валенсия», «Алавес» ва «Севилья» ҳам курашмоқда. «Валенсия» катта ўйинларда, айниқса «Реал» ва «Барселона»га қарши ўйинларда бошқача ҳаракат қилиши бу баҳснинг даражасини оширади. Бунинг устида ўйин «Месталья»да ўтказилади

ПРЕМЬЕР-ЛИГА
«Вулверҳэмптон» - «МЮ»
Ўйин вақти: 2 апрель, 23:45
Бугун АПЛда 33-тур ўйинларига старт берилади. Турни «Вулверҳэмптон» - «МЮ» ўйини бошлаб беради. «Кучли олтилик»га «суқулиб киришга» интилаётган «Вулверҳэмптон» Англия Кубоги ярим финалига айнан «МЮ»ни енгиб чиққанди. Шу боис, «МЮ» бу баҳсда кубокдаги мағлубият аламини олиш учун ҳам яхшироқ ўйнашга интилади. Сульшер клуб билан расман шартнома имзолагач жамоа битта ўйинда ғалаба қозонди.

«Юнайтед» нафақат Чемпионлар Лигаси йўлланмаси учун, балки учинчи ўрин учун ҳам курашмоқда. «Қизиллар» бу ўйиндан кейин «Барселона»га қарши ўйин олдидан 9 кун дам олишини инобатга олсак, Оле бемалол асосий таркибни ўйнатиши мумкин. «Португал бўрилари» лақабини олган «Вулверҳэмптон» ҳам «бекорчи эмас». Эшпириту Санту жамоаси кубокда ҳам ярим финалга чиққан.

«Тоттенҳэм» - «Кристал Пэлас»
Ўйин вақти: 3 апрель, 23:45
Бу ўйинда «Тоттенҳэм»нинг имкониятлари анча юқори ва у бошқа жиҳати билан ҳафта ўйинлари қаторидан жой олди. Шу куни «Тоттенҳэм» ўзининг янги аренасида майдонга тушади. 62 мингдан кўпроқ мухлисга мўлжалланган стадион очилишида «Тоттенҳэм» ҳар қандай рақибни мағлуб этишга интилади. Ўтган турда «Ливерпуль»нинг оёғидан чалишни эплолмаган «Тоттенҳэм» бор аламини «Пэлас»дан олиши мумкин.

Дисквалификацияни ўтаб бўлган «шпорлар» бош мураббийи Маурисион Почеттино бу ўйинда яна стадион четида туриши мумкин. Аргентиналик мураббий олдинги иккита ўйинда телефондан кўрсатма бериб, жуда қийналди. Рой Ҳожсон шогирдлари ҳам стадион очилиши бўларкан деб ютқазиб бериш учун ўйнашмайди. Футболда бировнинг байрамини бузиш рақиб учун ёқимли ишлардан бири саналади. «Пэлас» бу мавсумда «Сити»ни мағлуб этганини ҳам унутмаслик керак.

А СЕРИЯ
«Милан» - «Удинезе»
Ўйин вақти: 2 апрель, 22:00
Гаттузога кўпчилик ишонмаганди, лекин у собиқ жамоасини кучайтира олди. Айниқса, Кшиштоф Пёнтекнинг келгани «Милан»га ижобий таъсир қилди. Агар, шаҳарнинг бошқа жамоаси «Интер» яна битта ўйинда хато қилса, «Милан» 3-ўринга чиқиб олади. Бу ўйинда Пёнтек ҳам голлари сонини кўпайтириши мумкин. Чемпионат аввалида бу борада етакчи бўлган польшалик футболчи кейинчалик Роналду ва Куальяреллани ўтказиб юборди.

«Кальяри» - «Ювентус»
Ўйин вақти: 2 апрель, 23:55.
Бугун ўтказиладиган бу баҳсга «Ювентус» Роналду, Дибала ва Манжукичсиз йўл олди. Бу эса Мойзе Кин порлашда давом этиши мумкинлигидан далолат. «Ювентус» Италияда чемпионликни деярли ҳал қилиб бўлган. Шу сабаб бор эътиборини Чемпионлар Лигасига қаратмоқда. Бундан фойдаланган Мойзе Кин эса голлар уриб, Италия миллий жамоасига чақирилишга ҳам улгурди. Кўрамиз, у бугун қандай каромат кўрсатаркин...