АҚШ Мадуро кетиши ҳолатига венесуэлаликларга нақд доллар тарқатиш режасини тайёрлаб қўйди

Вашингтон Венесуэла президенти Николас Мадуро ҳокимиятдан кетадиган бўлса, Каракасга ёрдам бериш режасини тайёрлаб қўйган. Бу ҳақда журналистларга Оқ уйнинг миллий иқтисодий кенгаш бошлиғи Лоуренс Кадлоу маълум қилди.   

Кадлоу АҚШ Мадурони ҳокимиятдан четлатиш ниятидан қайтмаганини тасдиқлаган. “Биз Мадуро кетишини истаймиз”, деб айтган АҚШ вакили. Унинг таъкидлашича, АҚШ президенти Дональд Трамп маъмурияти “2-кун” деб ном олган Венесуэла иқтисодиётини тиклаш режасини тайёрлаб қўйган. Бу режа Мадуро кетгандан кейин 2-кунда амалга ошириладиган ҳаракатларни назарда тутади. “Бизда Венесуэла иқтисодиётини жонлантиришга, тез ҳаракат қилишга қаратилган катта режалар бор”, деб айтган Кадлоу. 

“Бизда молиявий режа бор. Озиқ-овқат, кўчаларда одамларга нақд пул етказиш борасида режаларимиз мавжуд. Ҳудуддаги банклар билан бу борада ишламоқдамиз”, деб қўшимча қилган Кадлоу.

Bloomberg ахборот агентлигининг хабар беришича, Кадлоу АҚШда Венесуэланинг амалдаги ҳукумати кетиши ҳолатида мамлакатга нақд доллар олиб кириб, уни аҳоли орасида тарқатишни кўзда тутувчи режа борлигини айтган. Бундай нафақаларни ажратиш каналлари сифатида банклар ва смартфон учун дастурларни қўллаш назарда тутилган. Кадлоунинг таъкидлашича, АҚШ ҳукумати бу режаларни мухолифат етакчиси Хуайн Гуайдо билан муҳокама қилмоқда.