Трамп французларни Нотр-Дамдаги ёнғинни ўчиришда ҳаялламасликка чақирди 

АҚШ президенти Дональд Трамп твиттерда Парижда бутун дунёга машҳур Нотр-Дам-де-Пари собори ёнаётганидан даҳшатда эканини билдирди.   

Трамп ибодатхона ёнаётганини кўриш аянчли эканини ёзган. У ёнғинни ўчириш учун зудлик билан гидросамолётлар қўллашни тавсия қилган.

“Нотр-Дам ёнаётганини кўриш – бу даҳшат. Балки, ўт ўчирувчи гидросамолётларни қўллаш мумкиндир. Тез ҳаракат қилиш керак!”, деб ёзган Трамп. 

Ёнғин реставрация ишлари олиб борилаётган ибодатхонанинг юқори қисмида чиққан. Айни вақтда черковнинг шпили, соати ва томи қулаб тушган.

Воқеа жойига Франция президенти Эммануэль Макрон йўл олган.

2013 йилда черков ўзининг 850 йиллигини нишонлаган. У Париж рамзларидан бири ҳисобланади ва унда Франция тарихидаги муҳим воқеалар юз берган.

900 йилдан кўпроқ тарихга эга черковда 1302 йил Франция қироллигининг илк генерал штатлари – ҳозирги парламентнинг тимсоли очилган. Унда Франция ҳалоскори Жанна д’Арк суд қилинган.   

Айнан шу ерда 1804 йилда Рим папаси Пий VII Наполеон Бонапартга тож кийдирган ва у французлар императорига айланган.