Саудия Арабистони ва БАА Суданга 3 миллиард долларлик кўмак кўрсатади

Саудия Арабистони ва БАА Суданга 3 миллиард долларлик кўмак кўрсатади. Бу ҳақда БААнинг BAM ахборот агентлиги хабар берди.  

“БАА ва Саудия Арабистони қардош Суданга ва унинг халқига 3 млрд долларлик ёрдамни эълон қилади”, деб айтилган хабарда. 

Ушбу қийматдан 500 млн доллари яқинда давлат тўнтарувини бошдан кечирган Суданнинг миллий валютаси ва марказий банкини қўллаб-қувватлашга сарфланади, қолган қиймат эса Судан халқига шошилинч ёрдам (озиқ-овқат маҳсулотлари, дори-дармон, нефть маҳсулотлари) кўринишида тақдим қилинади.

Суданда узоқ давом этган норозиликлардан кейин президент Умар ал-Башир ҳарбийлар томонидан ҳокимиятдан четлатилди, мамлакатни бошқаришни армия ўз зиммасига олган. Бироқ Суданда халқ норозиликлари тугамаяпти – намойишчилар фуқаролик бошқарув органи шакллантирилишини ва унга барча ҳокимият ваколатлари берилишини талаб қилишмоқда.