ИШИД Шри-Ланкадаги терактлар учун жавобгарликни ўз зиммасига олди

Фото: Athit Perawongmetha / Reuters

ИШИД 21 апрель куни Шри-Ланкада содир этилган ва 320 нафардан ортиқ кишининг ҳаётига зомин бўлган давомли терактлар учун жавобгарликни ўз зиммасига олди. Бу ҳақда ташкилотга яқин бўлган Amaq агентлиги хабар тарқатди.

ИШИДнинг ушбу баёноти ҳақида экстремистик сайтлар фаолиятини назорат қилувчи SITE порталида ҳам хабар қилинган.

Шу билан бирга, ташкилотнинг Шри-Ланкадаги черковлар ва меҳмонхоналарга ҳужумларга алоқадорлигини тасдиқловчи фактлар келтирилмаган.

Бундан аввалроқ, Шри-Ланка Мудофаа ва оммавий ахборотлар вазири Руван Вийевардене ушбу терактларни 2019 йил мартида Янги Зеландиянинг Крайстчёрч шаҳридаги масжидларда содир этилган терактларга жавоб бўлгани ҳақида гапирганди.