Осиё чемпионати. Исроил Мадримов қозоғистонлик боксчига ютқазиб, медалсиз қолди (видео)

Бангкокда бокс бўйича Осиё чемпионатининг ярим финали йўлланмаси учун жанглар давом этмоқда.

Ўзбекистонлик боксчилардан бугун биринчи бўлиб Шукуржон Раҳимов (-60 кг) рингга кўтарилди. У туркманистонлик Хурсанд Имонқуловга қарши жанг олиб бориб, ярим финалга чиқди. Иккинчи раундида Раҳимовнинг қоши ёрилгач, ҳакам жангни тўхтатди; бунга қадар устунликка эга бўлган Раҳимов очколар ҳисобига кўра ғолиб деб топилди.

Ўзбекистон терма жамоаси етакчиси Исроил Мадримов эса (-75 кг) иккинчи жангида ютқазиб қўйди. Уч кун олдин вьетнамлик боксчини қийинчиликсиз таслим этган Исроил чорак финалда қозоғистонлик Турсунбай Кулаҳметга қарши рингга чиқиб, очколар ҳисобида имкониятни бой берди.

23 апрель куни ўзбекистонлик яна 6 боксчи жанг ўтказади.

Кундузги дастур:
-91 кг: Санжар Турсунов – Чингиз Борбашев (Қирғизистон)
-60 кг: Райҳона Қодирова – Намуун Монхор (Мўғулистон)
-75 кг: Мавлуда Мавлонова – Веи-Сиен Лин (Хитой Тайпейи)

Кечки дастур:
-69 кг: Бобо Усмон Батуров – Асланбек Шимбергенов (Қозоғистон)
+91 кг: Баҳодир Жалолов – Хаипенг Му (Хитой)
-64 кг: Мафтуна Мелиева – Сучада Панич (Таиланд).

Эслатиб ўтамиз, кечаги баҳсларда ўзбекистонлик 4 нафар боксчи ярим финал йўлланмасини қўлга киритган бўлса, жамоанинг яна 4 нафар вакили, жумладан Ҳасанбой Дўсматов ҳам мағлубиятга учраб, мусобақани эрта якунлаган эди.