Поль Погба жамоадошларига «МЮ»дан кетишини айтди. Уни «Реал»да кутишмоқда

«Манчестер Юнайтед» яримҳимоячиси Поль Погба ёзда бошқа клубга ўтмоқчи.

L’Équipe тарқатган хабарга кўра, 26 ёшли француз «МЮ»даги жамоадошларига ёзда клубдан кетишни режалаштираётгани ҳақида айтган.

Погба «қизил иблислар» билан шартномаси муддати тугашига икки йил вақт бор. Клуб ҳозирча у билан келишувни узайтириш учун ҳаракат бошламаган.

Transfermarkt.de порталига кўра француз футболчисининг трансфер қиймати 90 миллион еврога тенг.

Айни вақтда «Реал» ва «МЮ» Погба бўйича музокараларни давом эттирмоқда. Инглизлар футболчиси трансферидан 130 миллион фунт стерлинг ишлаб олишни мақсад қилишган.

Погбанинг Манчестер клубидаги йиллик маоши миқдори солиқлар чиқариб ташланган ҳолатда 17 миллион еврони ташкил этади. Агар мадридликлар клуби ҳам унга шунча миқдорда маош тўлайдиган бўлса, у «Реал»нинг энг кўп маош олувчи футболчисига айланади.