УЕФА Неймарга дисквалификация қўллади

«ПСЖ» ҳужумчиси Неймар еврокубоклардаги 3 ўйиндан дисквалификация қилинди. Бу ҳақда УЕФА сайтида хабар берилган.

Дисквалификацияга 27 ёшли бразилиялик футболчи ЕЧЛнинг жорий мавсуми нимчорак финали доирасида «Манчестер Юнайтед»га қарши жавоб учрашувидан кейинги хатти-ҳаракатлари сабаб бўлган.

6 март куни Парижда кечган жавоб учрашуви «МЮ»нинг 3:1 ҳисобидаги ғалабаси билан якунланган, икки ўйин натижасига кўра инглизлар турнирнинг кейинги босқичига чиқишганди. Ўйиндаги ҳал қилувчи гол иккинчи бўлимга қўшиб берилган дақиқаларда мезбонлар дарвозасига белгиланган пенальтидан урилганди, ўшанда ҳакам видеотакрордан кейин тўп ҳимоячининг қўлига теккан деб топиб, 11 метрлик нуқтани кўрсатганди.

Ўша ўйинда жароҳати туфайли жамоасига ёрдам бера олмаган Неймар ўйиндаги ҳакамликдан норози бўлган ва ҳакамлар хонасига бостириб кирмоқчи бўлган. Бундан ташқари, у Инстаграмдаги саҳифасида ҳакамни қаттиқ ҳақоратлаган.