Telegraph Осиё ва Африкада Шри-Ланкадаги каби терактлар бўлиши мумкинлиги ҳақида хабар қилди

Разведка хизматларининг тахминича, ИШИД террорчи ташкилоти жангарилари Осиё ва Африканинг туристик ҳудудларида Шри-Ланкадаги каби янги ҳужумларни амалга оширишлари мумкин. Бу ҳақда разведка хизматидаги манбаларига таяниб The Sunday Telegraph хабар қилди.

Нашрнинг ёзишича, разведка ИШИД етакчилари гуруҳ таназзулга учрагани сабабли уни бошқаришни ўйламаётгани ва жангарилар террорчилик ҳужумлари уюштириш учун эркин ҳаракатланишлари мумкин деб тахмин қилмоқда.

Тахминларга кўра, Ироқ ва Сурияни тарк этаётган ИШИД жангарилари энди эътиборларини курортларга қаратишади. Янги терактлар содир этилиши мумкин бўлган ҳудудлар сифатида нашр манбалари Ҳиндистон, Мальдив ҳамда Кения ва Танзаниянинг туристик масканларини айтишган.

21 апрель куни Шри-Ланкада қатор портлашлар юз берди. Сўнгги маълумотларга кўра, терактлар оқибатида 250га яқин киши ҳалок бўлган.