Меркель сиёсатдан кетмоқчилигини тасдиқлади

Германия канцлери Ангела Меркель сиёсатдан кетмоқчилигини тасдиқлади. Унинг таъкидлашича, у ўзининг сиёсий фаолиятини канцлер лавозимидаги ваколати муддати ниҳоясига етгач, яъни 2021 йилдан кейин якунлайди.

Меркелнинг айтишича, шундан кейин у ҳеч қандай сиёсий лавозимни эгалламайди.

2018 йил 29 октябрда Меркель 2021 йилги сайловларда канцлер лавозимига даъвогарлик қилмаслигини маълум қилганди. Шунингдек, у бундестагга сайланиш ва бошқа сиёсий лавозимларга илгари сурилишдан бош тортган. 

2018 йил декабрда Меркель Германиянинг Христиан-демократик иттифоқи партияси етакчиси лавозимини тарк этган. Унинг ўрнини издоши Аннегрет Крамп-Карренбауэр эгаллаганди.

Ўшанда Германияда сўровнома ўтказилиб, унда ҳар учинчи немис Меркель ўз лавозимини муддатдан олдин тарк этишини исташини айтган. Меркелнинг ўзи эса ваколати муддати тугагунча ишламоқчилигини айтган.