АПЛ пулларни тақсимлади: 20-ўриндаги жамоа 120 миллион доллардан кўпроқ ишлади

Англия Премьер-Лигаси клублари мавсум давомида қанча даромад олгани маълум бўлди. АПЛ пулларни иккита кўрсаткич бўйича тақсимлади. Биринчидан, жамоаларнинг турнир жадвалидаги ўрни инобатга олинди. Иккинчи ва асосий омил сифатида қайси жамоанинг ўйини кўпроқ жонли эфирда кўрсатилгани танланди.

Чемпионатни иккинчи ўринда якунлаган «Ливерпуль» мавсум якунида АПЛдан энг кўп (152,4 миллион фунт) пул оладиган бўлди. «Ливерпуль» иштирокидаги ўйинлар умуммиллий телеканалларда кўпроқ намойиш этилгани учун клуб биринчи ўриндаги «Манчестер Сити»дан кўпроқ пул ишлайдиган бўлди.

«Ливерпуль» ўтган мавсум ҳам ўйини энг кўп намойиш этилган клубга айланганди. Премьер-Лиганинг қолган жамоалари қилган даромад ҳам чакки эмас. «Манчестер Сити» 151 миллион фунт, «Челси» 146 миллион фунт, «Тоттенҳэм» 145,2 миллион фунт ишлаган. Бу даромадларга фақат АПЛ мукофот пуллари ва трансляциядан олинган пуллар киритилган. Клубларнинг реклама шартномалари бунга кирмайди.

Юқоридаги икки критериядан ташқари барча тўловлар стандарт амалга оширилган, яъни ҳамма учун бир хил. Британия телевидениеси ҳаммага бир хил 34,4 миллион фунтдан, хорижий телеканаллар 43,2 миллион фунтдан, лиганинг ўзи эса 5 миллион фунтдан берган.

АПЛнинг қуйи поғоналаридаги жамоалар ҳам ёмон пул ишлашмади. Масалан мусобақани тарк этган ва 20-ўринда қолган «Ҳаддерсфилд» 96,6 миллион фунт, яъни 120 миллион доллардан кўпроқ ишлади. АПЛни тарк этган бошқа жамоалар «Фулҳэм» ва «Кардифф» эса мос равишда 101,9 миллион ва 102,7 миллион фунт билан қуйи лигага йўл олишди.