Reuters: Туркия Суриядаги исёнчиларга қурол етказиб беришни кўпайтирди

Туркия Суриядаги исёнчиларга қурол етаказиб беришни кўпайтирди. Бу ҳақда Reuters хабар бермоқда. Манбада айтилишича, Туркия Россия билан музокаралардан сўнг шундай қарорга келган. Туркия томон Россияни Сурия ҳукумат кучларига Идлибга кириш учун ёрдам беришни бас қилишга кўндира олмагач, шундай қарорга келган, дейилади хабарда.

Сурия мухолифотчи кучларининг раҳбарларидан бири Reuters'га Туркия томонидан ҳарбий кўмакнинг ортганини маълум қилган. Бунга Россия кўмагидаги ҳукумат кучларининг босими ортгани сабаб бўлган. Идлибдаги вазиятнинг таранглигича қолаётгани Туркия учун яхши оқибатларга олиб келмаяпти, чунки бунинг оқибатида Туркияда қочоқлар оқими кўпаймоқда.

Расмий Анқара бу маълумотларга изоҳ бермаган, лекин Туркия Суриянинг ўзи билан чегара қисмларида ўз назоратини ўрнатмоқчи эканини рад этгани ҳам йўқ.