Эрон президенти АҚШ таклиф қилган «аср келишуви»ни Фаластинга қарши фитна деб атади

Эрон президенти Ҳасан Руҳоний исроилликлар ва фаластинликларни яраштириш учун АҚШ илгари сураётган "аср келишуви"ни Фаластиннинг мақсадларини йўқ қилишга қаратилган фитна деб атади. Бу ҳақда Эрон ҳукумати сайтида эълон қилинган баёнотда айтилади.

"Аср келишуви – бу Фаластиннинг умидларини йўқ қилиш, оккупацияни кенгайтириш ва барча ислом давлатларини таҳқирлашга қаратилган фитна", - дейилади Руҳонийнинг Ислом ҳамкорлиги ташкилоти учрашувида қатнашаётган давлатлар раҳбарларига йўлланган мактубида.

Унинг сўзларига кўра, АҚШ ишлаб чиқаётган келишув хавфли, чунки унинг муаллифлари фаластинликларнинг ўз тақдирларини ўзлари белгилаш ва мустақил Фаластин давлатини барпо этиш ҳуқуқларидан маҳрум қилишга уринишмоқда.

Аввалроқ Фаластин Вашингтоннинг "аср келишуви"га рози бўлмаслиги, АҚШ ва Исроилнинг тинчлик ўрнатиш борасидаги барча охирги ташаббусларини рад этишини билдирганди.