«Бизни қаердан топишни билишади» — АҚШ давлат котиби Эрон билан зиддиятлар фонида Саудияга бормоқда

АҚШ давлат котиби Майкл Помпео Саудия Арабистони ҳамда БААга боришини маълум қилди. Помпео ташрифнинг мақсади сифатида АҚШ ва Эрон ўртасидаги охирги вақтларда кучайган зиддиятни келтирди.

«Биз ҳеч қандай олдиндан кўрсатилган шартларсиз музокаралар ўтказишга тайёрмиз. Улар (яъни, эронликлар дейилмоқда) бизни қаердан топишни аниқ билишади. Улар тайёр бўлган лаҳзадан биз музокараларни бошлаймиз», деб Саудияга жўнаб кетиш олдидан сафарнинг мазмунини баён қилган Помпеонинг сўзларини келтирмоқда Reuters.

Эрон АҚШнинг разведка дронини уриб туширгач, икки мамлакат ўртасидаги зиддият янада кучайди. АҚШ президенти бу ишдан сўнг аввалига Эронга ракета зарбалари бериш бўйича қарор қабул қилган, сўнг биргина дрон одамларнинг ўлимига арзимаслигини ўйлаб, қароридан қайтганини айтганди.

АҚШ сенати 22 июнь куни Трамп администрациясининг Саудия Арабистонига қурол-яроқ сотишини чеклаш бўйича қарор чиқарганди. Унга кўра Трамп маъмуриятининг Саудия билан режалаштирилган 8 миллиард долларлик қурол савдоси бекор бўлганди. Помпео бу ҳақда гапирар экан сенатнинг қарори Эрон фойдасига ишлашини айтганди.