Америкалик миллиардер одам савдоси айблови билан ҳибсга олинди 

Нью-Йорк ҳуқуқ-тартибот идоралари 6 июль куни америкалик молиячи, миллиардер Жеффри Эпштейнни жинсий эксплуатация мақсадида одам савдоси билан шуғулланиш айблови билан ҳибсга олди. Бу ҳақда The New York Times нашри хабар берди.

Маълум қилинишича, Эпштейн 8 июлда суд олдида жавоб беради. CBS телеканалининг хабар беришича, миллиардер Париждан ўз самолётида Нью-Жерси аэропортига қўнганда ҳибсга олинган.

Таъкидланишича, Эпштейн 10 йил аввал балоғатга етмаганларни фоҳишаликка ундашда айбланган. 2008 йилда у айбини тан олиб, тергов билан келишувга борган ва 13 ойлик қамоқ жазосини ўтаб чиққан. Бундан ташқари, у жабрланувчиларга товон пули тўлаш мажбуриятини ўз зиммасига олган ва жинсий жиноятчи сифатида қайд қилинган.

Маълум қилинишича, миллиардерга қарши янги суд тафтиши Miami Herald нашридаги мақола билан боғлиқ бўлиб, унда миллиардернинг аввал номаълум бўлган 4 нафар қурбони ҳақида сўз борган. 

Эпштейн айбини тан олишдан аввал Дональд Трамп, АҚШнинг собиқ президенти Билл Клинтон, Британия шаҳзодаси Эндрю билан дўстона муносабатларда бўлган.