Президент фаолиятини вақтинча тўхтатган тадбиркорлик субъектлари сони кўпайиб кетган вилоятларни танқид остига олди

Аввал хабар берганимиздек, Ўзбекистон Республикаси президенти Ш.Мирзиёев раислигида 23 июль куни кичик бизнес ва тадбиркорликни янада ривожлантириш масалаларига бағишланган видеоселектор йиғилиши ўтказилди.

Давлат раҳбари йиғилиш давомида кичик бизнес ва тадбиркорликни қўллаб-қувватлашнинг янги тизимига кўра иш олиб борилиши ҳақида тушунча берди. Шунингдек, вилоятларда шароит яратиб берилмагани учун ўз фаолиятини тўхтатган тадбиркорлик субъектлари сони кўпайиб кетганини кескин танқид остига олди.

«Кичик бизнес соҳасида фаолият кўрсатмаётган корхоналар сони ҳанузгача юқорилигича қолмоқда. Хусусан, жорий йил 1 июль ҳолатига тўхтаб қолган тадбиркорлик субъектлари сони 177 мингтани ёки жами субъектларнинг 26 фоизини ташкил этмоқда.

Айниқса, бу кўрсаткич Андижон вилоятида қирқ фоизни ташкил этаётгани ачинарли. Салбий ҳолат Андижон шаҳрида 46, Андижон, Асака туманларида 43, Избоскан, Улуғнор туманларида 42 фоизни кўрсатяпти.

Қорақалпоғистонда бу кўрсаткич 30 фоиз бўлиб, Нукус шаҳрида 35, Элликқалъа туманида 34, Қўнғиротда 33 фоиз эканлиги аниқланган.  Фаолият юритмаётган 4 мингта корхоналарда ўтказилган ўрганиш натижалари шуни кўрсатдики, уларнинг 1458таси (36 фоиз) айланма маблағлар ва кредит олиш учун гаров бўладиган мулк йўқлигидан, 681таси (17 фоиз) ер ва бино ажратиш, қурилиш ва муҳандислик тармоқларига уланиш учун рухсат олиш масалалари ҳал этилмагани, қарзи кўпайиб кетгани учун фаолиятини тўхтатган.

Энг ачинарлиси, ер, бино ажратиш муаммоларини жойида ҳал этиш мумкин. Кредит олиш учун гаров, мулк бўлмаса, суғурта механизмидан фойдаланса бўлади-ку? Ана энди ҳокимлар ҳафтасига уч кун ана шундай масалалар билан шуғулланади», — деди Шавкат Мирзиёев.