Tesla акциялари қулади – компания иккинчи чоракда 400 млн доллардан ортиқ зарар кўрган

Американинг Tesla электромобиллар ишлаб чиқарувчи компанияси йилнинг иккинчи чорагида 408 млн АҚШ доллари миқдорида зарар кўрди. Компания ўзининг молиявий ҳисоботини эълон қилгач, унинг қимматли қоғозлари нархи ҳам 11 фоизга арзонлади, деб хабар қилмоқда CNBC. Шу билан таҳлилчилар тахминлари ўзини оқламаган. 

Tesla рекорд миқдорда электромобиллар етказиб бергани ва Model 3 электромобилини кўп сотган бўлса-да, йилнинг иккинчи чорагидаги зарар жиддий бўлган. Компания даромади таҳлилчилар тахмин қилганидек 6,41 млрд доллар ўрнига 6,35 млрд долларни ташкил этган. 

Умуман, компания капиталлашуви йил бошидан буён 20 фоиздан кўпроққа тушиб, 45,43 млрд долларни ташкил этмоқда. Гарчи ҳисобот натижаси яхши бўлмаса-да, компаниянинг кўрсаткичи биринчи чоракдаги 702 млн долларлик зарарга қараганда сезиларли яхшиланган. 

Шу билан бирга, компания иккинчи чоракда 87 мингдан ортиқ электромобиль ишлаб чиқарган. Шу муддат вақт мобайнида мижозларга 95 мингдан ортиқ транспорт воситаси етказиб берилган. 

Йил бошида компания бош директори Илон Маск биринчи чоракдан бошлаб компания яна фойдага чиқишини билдирган, кейинчалик, биринчи чорак эмас, иккинчи чоракдан ишлар изига тушиб кетишини айтганди. Эндиликда, унинг бор умиди учинчи чоракдан бўлмоқда. Бундан ташқари, у Tesla 2019 йил якунига кўра, 360-400 минг дона электромобиль етказиб бериш режасини бажаришидан умидини узгани ҳам йўқ.