Қонунбузар учувчисиз учиш қурилмаларини «учиролмади»

Божхоначилар томонидан божхона қонунбузилиши ҳолатларига қарши самарали кураш олиб борилмоқда.

Жумладан, Хоразм вилояти божхона бошқармаси “Урганч аэропорти” чегара божхона пости ходимлари томонидан хориждан учиб келган фуқаро Ю.Г “яшил” йўлакдан ҳаракатланар экан, божхоначилар эътиборини тортди. Бу ҳақда Давлат божхона қўмитаси ахборот хизмати хабар бермоқда,

Натижада, ушбу шахс белгиланган тартибда божхона назоратидан ўтказилди. Текширув жараёнида фуқаронинг юклари орасидан божхона ходимининг оғзаки сўровида маълум қилинмаган ва декларацияда кўрсатилмаган 2 дона учувчисиз учиш аппарати борлиги аниқланди.

Ҳозирда юқоридаги ҳолатлар юзасидан божхона текширувлари давом эттирилмоқда.

Таъкидлаш жоизки, Ўзбекистон Республикасининг жорий йил 2 май куни қабул қилинган “Ўзбекистон Республикасининг Жиноят, Жиноят-процессуал кодексларига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида”ги ЎРҚ-534-сонли Қонуннинг 1-моддасига асосан, Ўзбекистон Республикасининг Жиноят кодекси 244-4-моддаси билан тўлдирилган бўлиб, учувчисиз учадиган аппаратларни қонунга хилоф равишда олиб кириш, ўтказиш, олиш, сақлаш ёки улардан фойдаланиш бўйича жиноий жавобгарлик белгиланган. Мазкур Қонуннинг 1-моддаси 2019 йил 4 ноябрдан амалга киритилади.