Бугун Англияда мавсумнинг илк финали: «шаҳарликлар» «безорилар»га қарши

Бугун Англияда янги мавсумнинг илк ўйини бўлади. Премьер-лига клублари учун янги мавсум бошланади десак, тўғрироқ бўлади, чунки Чемпионшип аллақачон бошланиб бўлган. Мамлакатнинг амалдаги чемпиони «Манчестер Сити» иккинчи ўрин соҳиби «Ливерпуль»га қарши Англия Суперкубоги учун баҳс олиб боради.

Қоидага кўра суперкубок олдинги мавсумда чемпионат ва кубокни ютган жамоалар иштирокида ўтказилади, аммо «Манчестер Сити» ўтган мавсумда иккита мусобақани ҳам ютгани учун «Ливерпуль» чемпионатдаги иккинчи ўрин соҳиби сифатида суперкубок учун майдонга тушади. Шу боис бугунги ўйинда «Манчестер Сити» кубок ғолиби сифатида, «Ливерпуль» чемпионат совриндори сифатида майдонга тушади. Хўш, бу икки суперклуб иштирокидаги суперкубок олдидан жамоаларнинг имконияти қандай?

«Қурғоқчилик»дан қутулган «Ливерпуль»

«Ливерпуль» Клопп келгунига қадар охирги марта 2012 йилда соврин ютганди. Ўшанда клуб ўз афсонаси Кенни Далглиш мураббийлигида Англия Лига кубогини қўлга киритган. Шундан сўнг «Ливерпуль»да «қурғоқчилик» бошланади. Жамоа узоқ йиллар ҳеч қандай соврин юта олмади ва Англиянинг энг одамсиз жамоаси сифатида мазах қилина бошланди. Айниқса «МЮ» мухлислари томонидан.

Аммо Клопп ҳаммасини ўзгартириб юборди. Жамоа германиялик мураббий билан икки марта Чемпионлар лигаси, бир марта Европа лигаси финалида ўйнади. Ўтган мавсумда эса ЕЧЛда ғолиб бўлиб, 7 йиллик совринсиз серияни тўхтатди. Энди «Ливерпуль» мухлислари жамоалари 30 йилдан буён Премьер-лигани ютмаган бўлса-да, «МЮ» мухлисларини тролл қилишлари мумкин. Масалан, «Чемпионлар лигасини охирги марта 11 йил аввал ютганлар мусобақанинг амалдаги ғолибини мазах қилса, кулгули туюларкан», деб.

Хуллас, Клопп «Ливерпуль» мухлисларининг юзи ёруғ бўлишига эришди. Унинг «безори йигитлари» энди ҳар қандай рақибни янчиб ташлай олади. Ўтган мавсумларда ҳам Салоҳ етакчилигидаги «Ливерпуль»нинг ўйини жуда зўр эди, аммо ўша совринсизлик руҳиятда кичик муаммоларни келтириб чиқараётганди. Ҳозир эса дунёнинг клублар ўртасидаги энг зўр мусобақаси амалдаги ғолиби сифатида майдонга тушадиган «Ливерпуль» ҳар қандай рақиб билан ўйинда руҳий устунликка эга бўлади.

Марказни мустаҳкамлаган «Сити», Англияни «ўзиники қилган» Гвардиола

«Манчестер Сити» мавсумлар оралиғида катта ва кўп трансферлар амалга оширишига одатланганмиз. Аммо ўтган мавсумларда «шаҳарликлар» трансфер учун шунчалик кўп пул сарфлашдики, бу мавсум олдидан фақат битта йирик трансферни амалга оширишди. Аммо ўша битта трансфер энг муҳим бўшлиқни тўлдирди. «Атлетико»дан сотиб олинган Родри майдон марказини мустаҳкамлади. Бу футболчи учун «Сити» 75 миллион евро сарфлади.

Шундоғам ўйини яхши чиқаётган жамоага янги футболчилар ҳадеганда қўшилавериши ўйинни издан чиқариши мумкин деб ҳисоблаган Гвардиола ортиқча ўзгаришлар қилмади.

Жамоанинг жароҳатдаги футболчилари сафга қайтишининг ўзи катта транфер бозорига айланади десак бўлади, чунки ўтган мавсум давомида «Сити»нинг жуда кўп футболчилари жароҳат олишди.

Гвардиола ҳеч бир жамоада 4 мавсумдан ортиқ ишламаган, ҳатто «Барселона»да ҳам. Аммо мураббий «Сити»да бу анъанага чек қўйиши мумкин. Янги мавсум «Сити»да Пеп учун айнан тўртинчиси бўлади ва мураббий қўпол қилиб айтганда Англияни «ўзиники қилиб олди». Дунёнинг энг зўр лигасида Фергюсондан кейин илк марта кетма-кет икки марта чемпион бўлган (охирги марта «МЮ» кетма-кет икки марта АПЛни ютганди) мураббийга айланиши Гвардиоланинг Альбионда узоқ вақт қолишига туртки бўлиши мумкин.

Пепнинг «Сити»сида энди асосий мотивация Чемпионлар лигасини ютиш бўлади, аммо бу жамоа ички мусобақаларга эътибор бермайди дегани эмас. Гвардиола «шаҳарликлар»ни ҳар йили кўплаб совринлар ютишга ўргатиб қўйди. Дарвоқе, «Манчестер Сити» Англия Суперкубогининг амалдаги соҳиби ҳисобланади. Гвардиола шогирдлари ўтган мавсумда «Челси»ни енгиб, совринни қўлга киритишганди. Ўша ўйин Маурицио Сарри учун Англиядаги дебют бўлганди.

Устунлик ким томонда?

Бугунги ўйин олдидан устунлик бирор жамоа томонида десак, балки тўғри бўлмас, аммо суперкубокда «Ливерпуль»нинг имконияти юқоридек кўринмоқда. Гарчи «Сити» амалдаги чемпион ва суперкубокнинг амалдаги соҳиби бўлса-да. Чунки ўтган мавсумни ўта юқори нотада тугатган Салоҳ ва жамоадошлари эндиликда дунёнинг энг зўр жамоасига айланишди. Дунёнинг энг зўр мусобақасини ютгандан кейин уларга яна қандай таъриф бериш мумкин? Шу боис «Уэмбли»да ўтадиган суперкубок баҳсида Клопп шогирдлари кичик бўлса-да, руҳий устунликка эга бўлишади.

«Ливерпуль» суперкубокни 13 йилдан буён ютмагани эса Клоппнинг «безори йигитлар»ига қўшимча мотивация бериши мумкин. «Қизиллар» устунлигининг яна бир жиҳати шундаки, бугун Клопп жамоасида нозик томон кўринмаяпти. Масалан, «Сити» марказда Родрининг мослашишини кутишга мажбур, чап қанот доимгидек кимга топширилиши ноаниқ, ҳужумда Агуэро ўйнайдими, Жезусми – бу ҳам аниқ эмас. «Ливерпуль»да эса таркиб мукаммал кўринишга келган, шу боис Клопп трансферга зўр бермади.

«Ливерпуль»га халақит бериши мумкин бўлган жиҳат шуки, жамоа етакчилари ёзда кам дам олишди. Масалан, Алиссон ва Фирмино Америка кубогида қатнашишди, Салоҳ ва Мане Африка кубогида, Ван Дейк Миллатлар лигаси финалида. Бу эса жамоа ўйинига таъсир қилиши мумкин. «Сити»да ҳам Агуэро, Жезус каби футболчилар Америка кубогида ўйнади, аммо Гвардиолада вариантларнинг кўплиги «Сити»га бу борада устунлик беради.

6та ўзгариш қилиш мумкин. Қўшимча вақт бўлмайди

Англияда футбол ўйинлари идеал тарзда ташкиллаштирилади. Жумладан, суперкубок ҳам. АПЛ жамоалари мавсумга айнан суперкубок ўйини орқали кириб келишини инобатга олиб, ўйин давомида 3та эмас, 6та ўзгариш қилишга рухсат беради. Бундан ташқари, 90 дақиқа ичида ғолиб аниқланмаса, қўшимча вақт бўлмайди ва жамоалар бирданига пенальтилар сериясига ўтишади.

Бугунга қадар бу мусобақада «Ливерпуль» 15 марта ғолиб бўлган. Шундан 5 мартасида соврин иккита жамоага берилган, 10 марта «Ливерпуль» рақибларни енгиб, суперкубокни қўлга киритган.

«Манчестер Сити» эса 5 марта Англия Суперкубогида ғолиб бўлган. Жумладан, ўтган йили ҳам. «Ливерпуль» эса охирги марта 2006 йилда бу совринни ютган.

Суперкубокда ғолиб бўлишда «МЮ»га тенг келадигани йўқ. Жамоа 21 марта «Комьюнити Шилд»да зафар қучган. «Арсенал» эса 17 марта, «Ливерпуль» бу борада учинчи.

«Фитнес барометр»

Англияда мавсумнинг илк ўйини ҳисобланган бу мусобақага «МЮ» мураббийи сэр Алекс Фергюсон ажойиб таъриф берган: «Албатта, бу ўртоқлик ўйини эмас. Аммо Суперкубокда биз футболчиларнинг жисмоний имкониятини синовдан ўтказамиз. Бу ўйин – ўзига хос фитнес барометр».

Суперкубокка шундай баҳо берганига қарамай, сэр Алекс унда 10 марта ғолиб бўлган. Хосеп Гвардиола «Комьюнити Шилд»га «мавсумнинг илк финали» деб таъриф берганди. Антонио Конте эса бу мусобақани ўртоқлик ўйинига тенглаштиришганида жаҳли чиққанини, бу ҳақиқий расмий ўйин ва ундаги ғалаба бутун мавсумга таъсир қилишини айтганди.

«Қарасам, бошқа Пеп экан...»

Ҳар икки жамоа мураббийлари ўйин олдидан бир-бирлари ҳақида илиқ фикрлар билдиришди. Жумладан, Клопп Чемпионлар лигаси финалидан сўнг Гвардиола билан телефон орқали гаплашгани ҳақида айтиб берди: «Ўйиндан кейин шифокоримиз Ли Нобс менга телефонини узатди. Унда «Пеп» деб ёзилганди. Мен Пеп Линдерс бўлса керак, деб ўйладим, лекин гаплашиб кўрсам, бошқа Пеп экан (кулади). Биз мавсум яхши ўтгани ҳақида гаплашдик, ҳазил қилдик. Пеп қўнғироқ қилганми ёки у билан «Сити»да ишлаган шифокоримизми, билмайман, аммо бу ажойиб суҳбат бўлганди», — дейди Клопп.

Гвардиола эса Клоппнинг жамоаларига қарши ўйнаш у учун ўзгача чорлов эканини айтди: «Клоппнинг ҳаракатлари, қучоқлаши, услуби, табассуми футболга ўзгача кайфият беради. У ажойиб мураббий, ҳақиқий топ-мураббий ва Клоппнинг жамоаларига қарши ўйнаш – мен учун доим янги чорлов. Биз ўтган мавсумда деярли ҳамма совринларни ютдик ва энди ҳаммасини яна бошидан бошлаймиз», — деди Гвардиола.

4 август. Англия суперкубоги
«ЛИВЕРПУЛЬ» — «МАНЧЕСТЕР СИТИ»
Лондон, «Уэмбли» стадиони.
Бош ҳакам: Мартин Аткинсон.
Ўйин вақти (Тошкент вақти билан): 19:00
Трансляция: «Футбол ТВ»