Бишкекда Атамбоев тарафдорлари йиғилиб, Жээнбеков кетишини талаб қилишмоқда

Қирғизистоннинг собиқ президенти Алмазбек Атамбоевнинг бир неча юз тарафдори 8 август Бишкекнинг марказий майдони Ала-Тоога кела бошлади. Охирги маълумотларга кўра, майдонда мингга яқин одам йиғилган.   

Улар амалдаги президент Сооронбай Жээнбековнинг кетишини талаб қилишган. 

Мамлакат ҳуқуқ-тартибот идоралари майдонга йиғилганларни у ердан сиқиб чиқара бошлашган. Одамларни тарқатиш учун ёруғлик-шовқин гранаталари қўлланган. 

Аввалроқ Атамбоевнинг қароргоҳи жойлашган Қўй-Тош қишлоғидан Бишкек томон мингга яқин одам йўл олгани маълум қилинган. Атамбоевнинг яна 30 га яқин тарафдори собиқ президент сўроқ қилинаётган миллий хавфсизлик биноси олдида навбатчилик қилган.

8 августда Атамбоев Қирғизистон махсус хизматларига таслим бўлди. У Бишкекка олиб кетилиб, сўнгра миллий хавфсизлик давлат қўмитаси биносига етказилган.