Покистон бош вазири "Озод Кашмир" пойтахтига боради

Покистон бош вазири Имрон Хон чоршанба куни Кашмирнинг Покистон қисмига ташриф буюради ва маҳаллий кенгашда Жамму ва Кашмир штатининг алоҳида мақоми бекор қилинганлиги муносабати билан нутқ сўзлайди. Бу ҳақда Покистон бош вазири девонхонаси маълум қилди.

"Имрон Хон маҳкама аъзолари ҳамроҳлигида Озод Кашмир маъмурий маркази Музаффарободда Покистон куни миллий байрамини нишонлайди. У шунингдек, партиялараро конференцияда иштирок этади ва Кашмир сиёсий партиялари етакчилари билан учрашади", - деб иқтибос келтирмоқда The Economic Times девонхона хабаридан.

Имрон Хон ташрифига тайёргарлик кўриш учун Покистон ташқи ишлар вазири Шоҳ Маҳмуд Қурайший Музаффарободга келди.

"Покистон халқи ва мамлакат раҳбарияти Жамму ва Кашмир муаммоси бўйича ягона позицияда ҳамда 14 август куни унинг аҳолисини қўллаб-қувватлашини билдиради", - деди у.