Навоийда илк бор «Узум сайли» ўтказилди — фотолар

Навоий шаҳридаги «Амфитеатр» мажмуаси боғида вилоятда илк бор ташкиллаштирилган «Узум сайли» ўтказилди. Бу ҳақда Kun.uz мухбири хабар бермоқда.

Ушбу сайлда узум етиштириш билан шуғулланадиган фермер хўжаликлари, майиз ҳамда узумдан тайёрланган виночилик маҳсулотлари кўргазмаси, узум шинниси ва мурабболар, полиз маҳсулотлари ҳамда мевалар кўргазмаси намойиши бўлиб ўтди.

«Узум сайли»га бағишланган расмлар танлови ҳам алоҳида ўрин олган. Шунингдек, миллий таомларимиздан «Миллий палов», «софи ош», «тандир кабоб» ҳам тайёрланди. Узумчиликни мадҳ этувчи терма, ўлан қўшиқлари ҳам барчага манзур бўлди.

Ушбу лойиҳанинг мақсади узумчилик соҳасида экспорт тизимини янада тараққий эттириш, узум етиштирувчи боғбонлар ўртасида сўнгги ютуқлар ва тажрибалар алмашиш, ноёб ва импорт ўрнини босувчи маҳсулотлар ишлаб чиқаришни кенгайтириш ва тизимга алоқадор халқаро алоқаларни йўлга қўйишдан иборатдир.

«Узум сайли»да Қизилтепа, Хатирчи, Нурота, Навбаҳор, Кармана ва Конимех туманларидаги узумчиликка ихтисослаштирилган фермер хўжаликлари маҳсулотлари намойиш этилди.

Майдонга кирган инсон ўзини худди узумзорда юргандек ҳис этади. Узум сайлини тарғиб этувчи тарқатма материаллар кўргазмаси ташкил этилди.

«Узум сайли»да ўн мингдан ортиқ аҳоли қатнашган бўлса, Туркия давлатидан 40 нафарга яқин меҳмонлар ташриф буюрди.

Навоий вилояти ҳокимлиги, вилоят фермер, деҳқон ва томорқа ер эгалари кенгаши, қишлоқ хўжалиги бошқармаси, маданият бошқармаси, Ўзбекистон бадиий академияси вилоят бўлими, Ўзбекистон Ёзувчилар уюшмаси вилоят бўлими, маънавият ва маърифат маркази вилоят бўлими, Навоий шаҳар ва туман ҳокимликлари ушбу сайлни юқори савияда ташкил этишда ҳамкорлик қилдилар.

Ушбу сайлда арзонлаштирилган мева, полиз маҳсулотлари ҳамда гўшт савдоси йўлга қўйилди.