Санкт-Петербургдаги кафелардан бирида Ўзбекистон фуқаросининг жасади топилди

Санкт-Петербургда «Бургер Кинг» кафесининг ёрдамчи хонасида Ўзбекистон фуқаросининг жасади топилди. Бу ҳақда Россия ОАВ ҳуқуқни муҳофаза қилиш органларига таянган ҳолда хабар берди.

Маълумотларга кўра, 14 сентябрь куни фастфуд ресторанининг директори ишга келган ва ёрдамчи хонага йўл олган, аммо эшик ичкаридан қулфланган бўлган. У бир соат давомида хонага киришга уринган ҳамда ўша ерда бўлиши керак бўлган ходимнинг уяли телефонига қўнғироқ қилган.

Эшик очилганда аёл ресторан ошпази, 26 ёшли ўзбекистонлик эркакнинг жасадини аниқлади.

Полиция видеокузатув камераларидаги ёзувлар, ресторанда бўлган ошпазнинг буюмлари ҳамда пичоқларини олган. Аниқланишича, ёрдамчи хонанинг эшигини фақат ичкаридан ёпиш мумкин бўлган. Кафега бостириб кириш ва жанжал белгилари топилмади.

Текширув ўтказилмоқда. Ҳуқуқни муҳофаза қилиш идоралари ходимларининг тахминича, марҳум ошпазнинг ишида жиноий омил бўлмаслиги ҳам мумкин.