«E-IJRO AUKSION» орқали мулк харид қилган шахснинг ҳуқуқи қай даражада кафолатланган?

Бугун, 27 сентябрь куни, Ахборот ва оммавий коммуникациялар агентлигида «Электрон онлайн-аукционларни ташкил этиш маркази»ДУКнинг «E-IJRO AUKSION» ЯЭСМ: тадбиркорлар ва инвесторлар учун янги имкониятлар» мавзусида матбуот анжумани бўлиб ўтади.

Матбуот анжуманида марказ директори Муҳиддин Хўжаев ва қатор масъул ходимлар иштирок этдилар. Тадбир давомида “E-IJRO AUKSION” ягона электрон савдо майдончаси, унинг имкониятлари ва ишлаш принциплари хусусида маълумотлар берилди.

Электрон онлайн-аукционлар ташкил этилганидан бери барча йўналишлар бўйича 18 минг 348 та мол-мулк савдога чиқарилиб, шундан 11 минг 751 таси 689 млрд.сўмга, ёки бошланғич нархига нисбатан 130 млрд. сўмга ортиқ сотилишига эришилган.

Шу билан бирга, ўтказилган аукционлар якунларига кўра, ғолиб иштирокчилар томонидан 2 трлн. 372 млрд. сўм инвестиция киритиш ҳамда 33 700 янги ишчи ўрин яратиш мажбуриятларини ўз зиммасига олганлар.

Kun.uz мухбирининг “аукцион ғолиблари бўлган мулкдорларнинг бу мулкка бўлган ҳуқуқи қай даражада ҳимояланган? Аукционда ғолиб бўлиб, пулини тўлаган, кейинчалик мулк турли сабабларни важ қилиб қайтариб олинган ҳолатлар ҳам кўп учраяпти. Бундай вазиятларда харидорнинг айби нима?” деган саволга марказ раҳбари Муҳиддин Хўжаев шундай жавоб берди:

– Савол ўринли, ҳақиқатан ҳам айрим харидорлар мулкни харид қилиб, пулини тўлаб бўлганларидан кейин ортга қайтариш ҳолатлари учраяпти. Аммо бундай қилиш учун фақат суд қарори лозим. Суд қарорига барча бўйсуниши керак. 1 октябрдан кучга кираётган янги тартибга кўра энди аукционда ғолиб бўлган мулкдорнинг мулкини қайтариш ҳатто муҳокама қилиниши ҳам мумкин эмас. Бу масала алоҳида назоратга олинган. Энди ким аукционгача бўлган жараёнда хато қилган бўлса, ўша барча зарарни қоплайди, аукциондан кейин мулк ҳар қандай шароитда ғолибда қолади.