Мирзиёевнинг Россияга ташрифи доирасида биринчи Ўзбекистон-Россия гуманитар форуми бўлиб ўтади

Ўзбекистон Президенти Шавкат Мирзиёевнинг 2019 йил бошида Россияга амалга ошириладиган ташрифи доирасида биринчи Ўзбекистон-Россия гуманитар форуми ўтказилиши режалаштирилган. Бу ҳақда РФ Федерациялар кенгаши раиси Валентина Матвиенко маълум қилди.

Шунингдек, 12 та ҳукуматлараро ва идоралараро ҳужжатлар имзоланиши кутилмоқда.

«Ҳозир Шавкат Мирзиёевнинг келгуси йил февраль ойида Россияга амалга ошириладиган давлат ташрифига жиддий тайёргарлик кўрмоқдамиз. Унинг доирасида минтақалараро ҳамкорликнинг иккинчи форуми бўлиб ўтади. Давлат раҳбарларининг бундай эътибори парламент аъзоларини ушбу яхши институтни ривожлантиришга ҳар томонлама қўллаб-қувватлов тақдим этишга мажбур қилади. Президентнинг ташрифи доирасида биринчи гуманитар ҳамкорлик форуми ҳам бўлиб ўтади», - деди Матвиенко.

Федерациялар кенгаши спикери давлатлар ўртасида икки мамлакат парламентларининг роли ва таъсири тобора ўсиб бораётганини таъкидлади.

«Биз давлатлар раҳбарлари ўртасида шаклланган муносабатларнинг суръати ва даражасига мос келишимиз керак. Ҳеч бўлмаганда ортда қолмаслигимиз, баъзида олдинда бўлишимиз лозим. Шунинг учун биз тегишли қўмиталар ва палаталар раҳбарияти доирасидаги алоқаларни фаоллаштиришни режалаштирмоқдамиз», - деди сенатор.

Шунингдек, у бугун Олий Мажлис ҳузуридаги Қонунчилик муаммолари ва парламент тадқиқотлари институти ҳамда Россия Федерацияси Федерациялар кенгаши девони таҳлилий-ҳуқуқий бўлими ўртасида имзоланган ҳамкорлик тўғрисидаги меморандумнинг аҳамиятини таъкидлади.