Светлана Радзивил Токио Олимпиадасига йўлланма олди

Тошкент шаҳрида енгил атлетика бўйича Ўзбекистон очиқ чемпионати бўлиб ўтди. Марказий Осиё мамлакатларидан ташриф буюрган атлетлар ҳам баҳс олиб борган турнирнинг бугун ўтказилган бир қатор баҳслари Ўзбекистон терма жамоаси учун муваффақиятли якунланди.

Аёллар ўртасида баландликка сакраш секторида иштирок этган ўзбекистонлик Светлана Радзивил 1.96 метр баландликни забт этиб, олтин медаль қатори Токио Олимпиадаси йўлланмасини ҳам қўлга киритди. Ушбу йўналишда Токио Олимпиадасининг нормативи айнан 1.96 метрни ташкил этарди. Ушбу йўналишда Надия Дусанова 1.85 метр билан шоҳсупанинг иккинчи поғонасига кўтарилди.

Етти кураш баҳсларида қатнашган Екатерина Воронина 6238 очко жамғариб, мусобақанинг олтин медалига эга чиқди.

Шу тариқа, Светлана Радзивил фаолиятида тўртинчи бор Олимпиада йўлланмасини қўлга киритмоқда. Радзивил бунгача Пекин (2008), Лондон (2012) ва Рио (2016) Олимпиадаларида ҳам иштирок этган эди.

Маълумот учун, бу Ўзбекистон терма жамоасининг Токио Олимпиадаси учун қўлга киритган ўн биринчи йўлланмасидир.