Давлат раҳбари, бош прокурор ва вазирлар... ДХРнинг собиқ амалдорлари раҳбарлик фаолиятини Россияда давом эттирмоқда

Украина шарқидаги [тан олинмаган] Донецк ва Луганск халқ республикаларининг юқори лавозимдаги собиқ амалдорлари Россиянинг раҳбар кадрлар резервини тўлдириши мумкин, деганди сентябрь ойи охирида Россия президентининг матбуот котиби Дмитрий Песков.

Унинг сўзларига кўра, Донбасс республикаларининг истеъфога чиққан раҳбарлари биринчи навбатда «депрессив регионлар»га йўналтирилади ва у ерда «аҳолининг турмуш даражасини ошириш учун бошқарув»га ёрдамлашади.

ДХРнинг собиқ раҳбари РФ республикаларидан бирининг пойтахтини бошқармоқда

Песков назарда тутган жараён аллақачон бошланган. 26 сентябрь куни ДХРнинг собиқ вақтинчалик раҳбари Дмитрий Трапезников Қалмиқистон республикаси пойтахти Элиста шаҳри админстрациясига раҳбар этиб сайланди. Бу эса Каспий денгизи бўйидаги республика аҳолиси ўртасида норозиликларга сабаб бўлди – Элистада Трапезниковнинг истеъфосини сўраб, бир неча марта рухсат этилмаган митинглар бўлиб ўтди.

7 октябрда Қалмиқистон раҳбари Бату Хасиков аҳоли вакиллари билан учрашувда Россия фуқаролигига эга бўлмаган Трапезниковни нега пойтахт мэри лавозимига тавсия этганини тушунтириб бера олмади.

2018 йил августида ДХР раҳбари Александр Захарченко ўлдириб кетилгач, тан олинмаган республикани унинг ўрнига бир ҳафта бошқарган Дмитрий Трапезников – фаолиятини Россияда давом эттираётган собиқ Донецк-Луганск раҳбарларидан энг баобрўси. Аммо у ДХРнинг раҳбарлик карьерасини эндиликда Россияда давом эттираётган ягона собиқ амалдори эмас. Бу ҳақда Republic нашри маълумот берди.

ДХРнинг собиқ таълим вазири – Россияда ОТМ директори

Лариса Полякова шу йил сентябрь ойида Ухта техника университетининг Воркутадаги филиали директори лавозимини эгаллади. Унинг шаҳар округи расмий сайтига берган интервьюсида бунга қадар кечган меҳнат фаолияти ҳақида жуда қисқа маълумот берилган.

Таъкидланишича, у фаолиятини мактабда математика фанидан дарс беришдан бошлаб, кейинчалик олий таълимда педагогик ва илмий фаолиятини олиб борган, сўнг эса «административ фаолият» билан машғул бўлган. Бутун интервью давомида Полякова айнан қандай «административ фаолият» билан шуғуллангани, яъни ДХР таълим вазири бўлгани ҳақида маълумот учрамайди.

Донбассдан Россияга келган бошқа раҳбар кадрлардан фарқли ўлароқ, Лариса Полякова ҳақида маълумотлар жуда кам. Шуниси маълумки, у – математика фанлари доктори, 2015-2018 йилларда ДХРнинг таълим тизимини бошқарган, урушга қадар Донецк давлат университетида кафедра мудири бўлган.

Полякова ДХРда таълим вазири бўлиб ишлаган вақтида рус маданиятини оммалаштиришга бағишланган чиқишлар қилиб турган, олий таълимда Болонья тизимидан воз кечиб, «совет моделига яқинлаштирилган» таълим тизимини яратишга ваъда берган. Унинг вазирликдан истеъфоси ҳам ими-жимида рўй берган: Захарченко 2018 йил 19 февралда имзолаган қарор 1 мартда эълон қилинган, шу куни Полякованинг ўринбосари Ирина Симонова коррупция айблови билан қўлга олинган.

ДХРнинг собиқ бош прокурори – Москва Тергов қўмитаси раҳбарига ўринбосар

Равиль Халиков Россиянинг Мордовия республикасида туғилган. Юридик олий маълумот олиб, армияда хизмат қилиб қайтгач, Мордовия прокуратурасининг алоҳида муҳим ишлар бўлимида фаолият бошлаган, кейинчалик Чеченистонга кўчиб ўтган. У Россияда дастлаб номзодлик, сўнг докторлик диссертациясини ёқлаган. 2014 йилгача Москвада яшаб, Давлат мулкини бошқариш федерал агентлигида ишлаган, Олий иқтисод мактабида кафедра мудири бўлган.

Қрим аннекцияси вақтида Халиков ўз хоҳиши билан яриморолга бориб, ҳарбий разведкага раҳбарлик қилган, шундан сўнг Донбассга ўтказилган. 2014 йил майида у ДХРнинг илк бош прокурори этиб тайинланган. Бу лавозимдаги илк кунидаёқ у Украинанинг энг бой одами, Донбассдаги йирик корхоналар хўжайини, миллиардер Ринат Ахметовга қарши жиноят иши қўзғатган. Ахметов ўз қўл остидаги ташкилотлар ходимларини исёнчи республикаларга қарши иш ташлаш эълон қилишга чақирган бўлиб, ДХРнинг янги прокурори унинг бу ҳаракатини «давлат ҳокимиятини ағдаришга уриниш» деб баҳолаган.

2014 йил октябрига бориб, Равиль Халиков янги лавозимга тайинланган – ДХР Бош вазирининг хавфсизлик масалалари бўйича ўринбосари сифатида иш бошлаган. Бу лавозимда у адлия, суд ва ҳуқуқни муҳофаза қилувчи органлар фаолиятини назорат қилган, шунингдек, Минск музокараларини тайёрлашда қатнашган.

2017 йил кузида Халиков Москвага қайтиб, Москва Тергов қўмитаси бош бошқармаси бошлиғининг катта ёрдамчисига айланди. Mash телеграм-канали хабарига кўра, у идоранинг ички интизом масалаларига масъул этиб тайинланган.

ДХРнинг собиқ Давлат хавфсизлиги вазири – «СТАНКИН» проректори

Андрей Пинчук Молдованинг Тирасполь шаҳрида туғилган. Иккита мутахассисликка эга – юрист ва иқтисодчи. Карьерасини ўз ватанининг кучишлатар тизимларида бошлаган. 2005 йилда тан олинмаган Приднестровия Молдова Республикасининг Давлат хавфсизлиги вазирлиги майорига айланган, кейинроқ идора раҳбарига ўринбосар даражасига кўтарилган.

Шундан сўнг Пинчук Россияга йўл олиб, РФ президенти қошидаги Россия халқ хўжалиги ва давлат хизмати академияси (РАНХиГС)да сиёсий фанлар номзоди илмий даражасини олган – 2011 йилда у терроризмга қарши кураш мавзусида номзодлик диссертациясини ёқлаган.

2014 йилда Андрей Пинчук, ўзининг айтишича, «Россиянинг йирик корпорациясида департамент раҳбари» бўлган. Баъзи манбалар у «Ростех» таркибига кирувчи «Бирлашган двигателсозлик корпорацияси» ОАЖнинг хавфсизлик департаменти бошлиғи бўлганини айтишади.

Украинада тартибсизлик бошлангач, Пинчук ўзининг таъбирича «юрак амри билан» Қримга кўчиб ўтган. Интервьюларидан бирида айтишича, у яриморолда «Украина махсус хизматларининг бўлинмаларини Қрим мустақил республикаси юрисдикциясига ўтказиш» билан шуғулланган.

Қримда бир неча ҳафта фаолият олиб боргач, Пинчук бир неча ойга Москвага қайтиб, сўнг Донбассга йўл олган. Донецкда у ДХР ҳукуматининг илк раҳбари, россиялик Александр Бородайга хавфсизлик масалалари бўйича ўринбосар этиб тайинланган. Бу тайинловдан бир неча кун ўтиб, 17 июлда – Малайзиянинг «Боинг» самолёти қулаган куни Давлат хавфсизлиги вазири лавозимини эгаллаган.

Вазирликнинг ўзи ҳам худди шу куни ташкил этилган, яъни ДХР разведкасини айнан Пинчук нолдан ташкил қилган, дейиш мумкин. У Минск келишуви имзоланиши ортидан, 2015 йил мартида истеъфога чиқди. 2017 йил сентябрида сиёсатчи, иқтисодчи, юрист ва ҳарбий офицер Пинчук «СТАНКИН»Москва давлат техника университетининг биринчи проректори сифатида иш бошлади. Украинадаги урушдан сўнг у бир нечта автобиографик асарларини чоп этган.