АҚШ ва Туркия Суриядаги ҳарбий амалиётни тўхтатишга келишиб олди

«Туркия YPG [курдларнинг Халқ мудофааси отрядлари] кучлари хавфсизлик ҳудудига 120 соат ичида чиқиши учун ўт очишни тўхтатади. «Тинчлик булоғи» доирасидаги барча ҳарбий амалиётлар YPG кучлари олиб кетилгандан кейин тўхтатилади», деб айтган Пенс. 

Унинг таъкидлашича, томонлар АҚШ курд отрядларининг олиб кетилишида кўмак кўрсатишига келишиб олган.

Курд отрядлари ташқарисига олиб чиқиладиган демаркация чизиғи Суриянинг Туркия билан чегарасидан 30 км жанубдан ўтади. Вашингтон курдлардан Туркия чегарасидан уюшган ҳолда кетишлари кафолатини олган.

Пенс, шунингдек, АҚШ Сурия шимолида ҳарбий ҳаракатлар олиб бормоқчимаслиги ва дипломатия билан чекланмоқчилигини таъкидлаб ўтган.

«Президент ҳарбийларимиз у ерда бўлмаслигини айтди. Биз ушбу вазиятда ҳарбий томондан иштирок этмаймиз», деб қўшимча қилган АҚШ вице-президенти.

У, шунингдек, АҚШ Туркияга Сурия туфайли қўшимча санкциялар киритишни режалаштирмаётганига ваъда берган ҳамда Трамп Туркия Сурияда ўт очишни тўхтатиши билан Анқарага қарши киритилган иқтисодий санкцияларни бекор қилишга тайёрлигини таъкидлаб ўтган.

Кейинроқ Туркия ташқи ишлар вазири Мавлут Човушўғли Анқара АҚШдан «истаган нарсасини олгани»ни айтган, чунки курдлар кўзда тутилган ҳудудни тарк этади. Човушўғлининг айтишича, курдлар олиб кетилгандан кейин Туркиянинг Суриядаги амалиёти якунлангани ҳақида гапириш мумкин бўлади.

Бундан аввалроқ Трамп твиттерида Туркиядан «ажойиб янгилик» келгани ҳақида ёзганди.

«Эрдўғанга раҳмат. Миллионлаб кишиларнинг ҳаёти сақлаб қолинди», деган у.

«Тинчлик булоғи» амалиёти

Туркиялик ҳарбийлар 9 октябрь куни Сурия чегарасини кесиб ўтиб, курдларга қарши ҳарбий ҳаракатлар бошлаганди. Улар АҚШ президенти Сурия шимолидаги америкалик ҳарбийлар олиб кетилишини эълон қилганидан сўнг «Тинчлик булоғи» номли амалиёт бошлашга қарор қилишганди.

Расмий Анқара курд ҳарбий бўлинмаларини Туркиянинг жанубий чегараларидан узоқроққа суриб ташлаб, чегара ҳудудида суриялик қочқинлар учун «хавфсиз ҳудуд» барпо этишни режалаштирганди.

Бу амалиётни танқид қилувчилар, бу амалиёт биринчи навбатда курдларга қарши этник геноцидга айланиб кетиши мумкинлигидан хавотир олишганди. Шунингдек, курдлар назорат қилаётган қамоқхона ва лагерлардан ИШИДнинг минглаб собиқ жангарилари қочиб кетиши хавфи туғилди.

Ҳарбий ҳаракатлар бошлангач, ўн минглаб одамлар ўз бошпаналарини тарк этишди.

Майк Пенснинг сўзларига кўра, Туркия ўз ҳарбийларини Суриядан олиб чиқиши билан бу давлатга нисбатан қўлланган санкциялар бекор қилинади.

Курдларнинг вакиллари Вашингтон ва Анқара ўртасидаги музокараларда иштирок этишмади, ҳозирча улар томонидан АҚШ ва Туркия баёнотига нисбатан изоҳ берилмади.