Нидерландияда хилватдаги ферма ертўласида 9 йилдан бери «қиёматни кутиб яшаган» оила топилди

Маҳаллий нашрларда ёзилишича, фермадаги текширув ишлари вақтида Австрия фуқароси бўлган 58 ёшли Йозеф. Б қўлга олинган. У ҳар замонда фермага келиб турган, бу ерда унинг 16 ёшдан 25 ёшгача бўлган 6 фарзанди тўлиқ изоляцияда яшаб келган. Йозеф. Б терговчилар билан ҳамкорлик қилишдан бош тортган, энди у суд қилинади.

У ноқонуний равишда озодликни чеклаш ва саломатликка хавф туғдиришда гумон қилинмоқда. 

Ушбу хилватдаги фермага у ердагиларнинг каттаси қочиб чиқиб, маҳаллий бардагиларга барча воқеани айтиб берганидан кейин полиция келган. 

25 ёшли йигитнинг ташқи қиёфаси ва хатти-ҳаракатлари бар эгаси Крис Вестербекда ташвиш уйғотган. «У беш ҳисса пиво буюртма қилиб, ҳаммасини ичди. Кейин мен у билан суҳбатлашдим, у қочиб чиққани ва унга ёрдам зарурлигини айтди. Биз полиция чақирдик», - деб айтган Вестербек RTV нашри журналистларига.

«Унинг соч-соқоли ўсиб кетганди, эски кийимда ва нима бўлаётганини тушунмаётгандек кўринарди. У ҳеч қачон мактабда ўқимаганини ва 9 йилдан бери сартарошга бормаганини айтди»,-дея қўшимча қилган бар эгаси.

Вестербекнинг сўзларига кўра, йигит кичик укалари ва сингиллари билан фермада изоляцияда яшаганини ва улар бу жойни ташлаб чиқишлари кераклигини англагани ҳақида гапириб берган.

Шундан сўнг полициячилар уйга киришган ва махфий эшик ортидаги пастга йўналган зина орқали оила истиқомат қилган ертўлага тушишган. У ерда йигитнинг 5 нафар ука ва сингиллари, шунингдек, болалар ўз отаси деб атаган эркак топилган.

Ҳозирда оила топилган фермадан 16 километр узоқликда жойлашган яна икки уйда тинтув кетмоқда.

Қўшнилар ҳеч нимани пайқашмаган

Уй чамаси 3 минг аҳолига эга Рюнерволд қишлоғига узоқ бўлмаган ҳудудда жойлашган, аммо атрофида ўсувчи дарахтлари туфайли кўзга ташланиши қийин бўлган. Ферма қишлоқдан анча узоқда жойлашган ва унга етиб олиш учун каналга ўрнатилган кичик кўприк орқали борилади.

У ерда катта бўлмаган хўжалик бор — томорқа ва эчки. Қўшнилардан бирининг сўзларига кўра, авваллари бу ерда ғозлар ва ит бўлган, аммо у ҳеч қачон бу ерда болаларни учратмаган — фақат катта ёшли эркакни кўрган. Томорқада сабзавот ҳам етиштирилган.

Қўшнилар бир эркак фермага мунтазам келиб тургани, у бу ерда нимадир қураётганини тусмол қилишгани ҳақида айтишган. Аммо у доим дарвозани ёпиб юрган ва ҳеч ким билан гаплашмаган. 

Маҳаллий хат ташувчи у ерга ҳеч қачон хат олиб бормаганини ва бу ғалати бўлганини энди пайқаганини айтган. 

Маҳаллий нашрлардан бирининг мухбири ўзининг твиттерида шундай ёзади: «Кўринишидан, оила охирзамон келишини кутиш мақсадида беркинган. Канал бўйидаги уй қишлоқдан бир неча километр узоқликда. Ҳозирда жадал текширув ишлари олиб борилмоқда. Бизни ўтказишмаяпти».

«Бизда ҳали ҳам кўплаб саволлар жавобсиз қолмоқда», - дея ёзилади маҳаллий полиция твиттерида. Айни вақтда детективлар эҳтимолий бир неча тахмин устида бош қотиришмоқда.

Хусусан, оила қачондан бери ертўлага яшириниб келгани ва болаларнинг онасига нима бўлгани номаълум. Мэрнинг сўзларига кўра, аёл анча вақт олдин вафот этган.

Уй атрофи ва уни ўраб турувчи ҳудудларда полиция назорат ўрнатган.

Сўнгги маълумотларга кўра, ушбу воқеадан сўнг 58 ёшли эркак инсультни бошдан кечирди.