Европадаги энг йирик ўғрилик: Дрездендаги музейдан 1 млрд евролик зеб-зийнатлар олиб чиқиб кетилди 

Германиянинг Дрезден шаҳрида жойлашган “Яшил гумбаз” музейидан 1 млрд евролик зеб-зийнатлар ўғирлаб кетилди. Ушбу музейда Европадаги энг катта хазиналар коллекцияси сақланади. 

Жиноятчилар музейга кириш учун яқин орадаги кўприк остида жойлашган трансформаторга ўт қўйиб, шаҳар марказидаги бир нечта музейни электр токисиз қолдиришган. Сўнгра бир неча киши электр токи йўқлиги сабабли сигнализация ишламаётганидан фойдаланиб соат 5лар атрофида музейнинг бурчагидаги ойнадан унинг ичига кирган. Ўғрилар музейдан бир нечта бриллиант ва бошқа қимматбаҳо зеб-зийнатларни олиб чиқиб кетишган. 

Bild нашрининг ёзишича, жиноятчилар ваза, суратлар ва бошқа йирик предметларга тегмай, фақатгина тақинчоқларни ўғирлашган.

🇩🇪 #Dresden Green Vault robbery: Thieves break into treasure museum https://t.co/DCLeWdz2aQ pic.twitter.com/QpQqLbchjS

— Museum Workers (@IMWD2030_) November 25, 2019

Полицияда маълум қилинишича, икки жиноятчи видеокузатув камераларига муҳрланиб қолган. 

Музейда олтин, кумуш, қимматбаҳо тошлар, фил дандон тиши ва бошқа қимматбаҳо материаллардан ишланган 3 мингга яқин зеб-зийнат ва буюмлар сақланади.