Хабиб Нурмагомедов кейинги жангини Тони Фергюсонга қарши ўтказади

Фото: AP Photo/John Locher

UFC чемпиони Хабиб Нурмагомедов 2020 йил 18 апрелда Нью-Йоркнинг Бруклин туманида ўтадиган мусобақада америкалик Тони Фергюсон билан жанг ўтказади. Бу ҳақда твиттерда унинг менежери Али Абдулазиз маълум қилди.

Абдулазиз маълумотларига кўра, Нурмагомедов Фергюсонга қарши жангга шартномани имзолади. “Чемпион Тони Фергюсонга қарши жангга келишувини имзолади. Бургут 18 апрелда Бруклинга қўнади. Бу барчаси мухлислар учун”, деб ёзган спортчининг менежери ва шартноманинг суратини илова қилган.

Here we go. The champ signed his bout agreement against tony Ferguson. This man has been asking for this ass whooping and now he has earned it April 18th the eagle will land in Brooklyn one more time. This one is for the fans. pic.twitter.com/ifG2f9Yt9l
— Ali Abdelaziz (@AliAbdelaziz00) November 26, 2019

Бироқ, таъкидланишича, Фергюсон ҳозирча жангга шартномани имзоламаган, аммо унинг томони Бруклинда мусобақа ўтказилишига қизиқиш билдирмоқда.

Бу Фергюсон ва Нурмагомедов ўртасида жанг ташкиллаштиришга 5-уринишдир. Икки спортчи дастлаб 2015 йил декабрда учрашиши керак эди, бироқ Хабиб жароҳати туфайли жанг ўтказа олмаган. Шундан кейин жанг 2016 йил апрелга кўчирилган, бироқ бу сафар америкалик соғлиғидаги муаммолар сабабли октагонга чиқа олмаган. 2017 йилда эса Нурмагомедов вазн ташлашда юзага келган муаммолар сабабли шифохонага тушган, 2018 йилда Фергюсон тиззасидан жароҳат олиб, яна жангга чиқа олмаган.