Кўп қаватли уйлар таъмири учун ажратилган пулни талон-торож қилган ХУЖМШ мансабдорларига жиноий иш очилди

Тошкент шаҳрида кўп қаватли уйларни таъмирлаш учун ажратилган кредит маблағлари «Гулзор-Б.» номли ХУЖМШ томонидан талон-торож қилингани аниқланди. Бу ҳақда Бош прокуратура матбуот хизмати хабар бермоқда.

«Бош прокуратура ҳузуридаги Департаментнинг Мирзо Улуғбек тумани бўлими томонидан ўтказилган терговга қадар текширувда, банк муассасаси томонидан 2017-2018 йилларда «Гулзор-Б» номли хусусий уй-жойлар мулкдорлари ширкатига қарашли кўп қаватли уйларда таъмирлаш ишларини амалга ошириш учун ажратилган 2,6 млрд. сўм кредит маблағлари «О.B.», «М.U.» ва «K.Y.» МЧЖларга қурилиш-таъмирлаш ишлари учун ўтказилиб, шундан, 194,8 млн. сўмлик бажарилган ишлар бўйича ҳужжатлар «Гулзор-Б» ХУЖМШга тақдим қилингани, қолган 2,4 млрд сўмлик бажарилган ишлар учун тасдиқловчи ҳужжатлар йўқотилгани аниқланган.

Мазкур ҳолат юзасидан «Гулзор-Б.» ХУЖМШ ҳамда «О.B.», «М.U.» ва «K.Y.» МЧЖлар мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда», дейилади хабарда.