“Илтимос, бизни ўлдирманг”: Америкалик актриса генерал Сулаймонийнинг ўлими учун эронликлардан узр сўради

Америкалик таниқли актриса ва қўшиқчи Роуз Макгоуэн твиттердаги саҳифасида эронлик генерал Қосим Сулаймонийнинг америкалик ҳарбийлар томонидан ўлдирилиши учун Эрондан узр сўради ва АҚШ фуқароларини “ўлдирмаслик”ни сўради. 

“Ҳурматли Эрон, АҚШ давлатингизни, байроғингизни, халқингизни ҳурмат қилмайди. 52 фоиз америкаликлар сиздан узр сўрайди. Биз миллатингиз билан тинчликни истаймиз. Биз террорчилик тузуми асирлари ҳисобланамиз. Ундан қандай қочишни билмаймиз. Илтимос, бизни ўлдирманг”, – деб ёзган актриса.

Актриса кейинроқ ушбу твити учун унга билдирилган кўплаб танқидларга Эронни қўллаб-қувватламаслиги, шунчаки мамлакати яхшироқ бўлишини исташи билан жавоб берган. 

Макгоуэннинг ёзишича, Сулаймоний “ёвуз одам бўлган, кўп ёвузликлар қилган”, бироқ “гап ҳозир бу ҳақида эмас”. Унинг таъкидлашича, АҚШ “маънан коррупциялашган ва қонунга хилоф тарзда ҳаракат қилади”. Актриса “Эронни қўллаб-қувватламаслигини” ва “аниқ АҚШ томонда эмаслигини” ёзган.

Макгоуэн ўз танқидчиларига янги уруш бошланиши мумкинлигидан қўрқиб кетгани, воқеаларга бундай муносабат билдиришга ҳақли экани, бу “демократиялиги” ва у учун “кўплаб жасур аскарлар жанг қилгани” билан жавоб қилган.