Қозоғистондаги халқаро олимпиадада ўзбекистонлик ўқувчилар 6 та медални қўлга киритди

9-15 январь кунлари Қозоғистоннинг Олмаота шаҳрида дунёнинг 21 давлатидан 600 нафарга яқин ўқувчилар иштирокида математика, физика ва информатика фанларидан 16-халқаро Жаутиков олимпиадаси (IZHO) бўлиб ўтди. 

Ушбу олимпиадада қатнашган Ўзбекистон жамоаси 6 та медални қўлга киритди. Юртимиз академик лицей ўқувчилари мусобақада муваффақиятли иштирок этиб, терма жамоа ғалабасига муносиб ҳисса қўшди. 

Улардан академик литцей ўқувчилари 3 та бронза олган бўлса, мактаб ўқувчилари 1 та кумуш ва 2 та бронза медалини қўлга киритди.

Жумладан, Бухоро давлат университети Қоракўл академик лицейи 2-курс ўқувчиси Шаҳбоз Ҳасанов, Ўзбекистон миллий университети Табиий ва аниқ фанларга ихтисослаштирилган С.Сирожиддинов номидаги республика академик лицейининг 2-курс ўқувчиси Фарруҳ Маҳмудов ҳамда Наманган давлат университети академик лицейи ўқувчиси Иброҳимжон Мирғиёсовлар математика фанидан бронза медални қўлга киритдилар.