«Бизни хўрлаб, ўзга юртда ташлаб кетди». Россияда фарзандлари билан ёлғиз қолдирилган аёллар ҳикояси

Россияга сафаримиз давомида ўзга юртга бориб, ҳаётда ўз ўрнини топган ватандошлар билан учрашишдан ташқари, Россияда ижтимоий муаммоларга дуч келган, ёрдамга муҳтож бўлиб қолган, эри ташлаб кетган ёки ўзлари фарзандлари билан ёлғиз қолган аёллар билан ҳам учрашдик.

Аслида оилавий, қариндош-уруғ ўртасидаги можаролар ва келишмовчиликларга аралашмаслик Kun.uz таҳририятининг асосий қоидаларидан бири эди. Бироқ, Россияда кўп йиллар бир ёстиққа бош қўйган рафиқасини гўдаклари билан бирга ташлаб кетганлар борлигини эшитиб, шундайларни учратиб, бундай иллатни жамоатчиликка кўрсатишга қарор қилдик.

Илк қаҳрамонимиз Г.М асли фарғоналик бўлиб, бир неча йилдирки, Россиянинг Самара области, Сизрань шаҳрида истиқомат қилиб келмоқда. Унинг қарамоғида 6 нафар фарзанд бор. Бугунги кунда унинг бошига жиддий ташвиш тушган: ватанга қайтишнинг чорасини қила олмаяпти. Ўзбекистонга қайтиш учун ҳужжатларни тўғрилашга ҳам маблағ орттира олмаяпти.

Гап шундаки, шу йилнинг ноябрь ойи бошида турмуш ўртоғи Ҳ.М. Фарғона вилоятига қайтгач, оиласидан ажрашиш фикрига тушиб қолган. Икки ўртада 5 қиз ва 1 ўғил бор. Улар бугунги кунда онаси билан Сизранда истиқомат қилиб келмоқда. Аёл кўп йиллар қийналиб, ҳаётнинг оғир-енгил кунларини биргаликда ўтказиб, шу ёшга етганида бу кўргиликка дуч келиб турибди.

Kun.uz мухбири айни муаммо сабабларини ўрганиш, Г.М.нинг оилавий шароитини кўздан кечириш учун Самаранинг Сизрань шаҳрига бориб, она ва болалари билан учрашди.

«Эрим 8 ноябрь куни енгил машина орқали Ўзбекистонга кетди. Телефонлашиб турдик. Бироз вақт ўтгач, қайнонам 5 қизни чиқаришнинг ўзи бўлмайди, ажрашасан, деб ўғлини кўндирибди. Энди ажрашаман деб турибди. Мен бир неча марта президент виртуал қабулхонасига ҳам ёздим.

Эрим мени хиёнатда ушлаб олганини айтиб юрибди. Қани ким билан ушлаб олибди? Исботлаб берсин, майли ажрашсин. Ўзбекистонга кетай десам, моддий имконим йўқ. Олти бола ва ўзимга чипта пули керак. Ҳужжатлариям жойида эмас», дейди суҳбатдош.

Г.М. бугунги кунда шаҳарнинг кўп қаватли уйларига коммунал хизмат кўрсатувчи фирмалардан бирида ишлайди. Вазифаси ўзига бириктирилган кўп қаватли уйларнинг ҳовлиси, теварак-атрофини ораста сақлаш. Ойлик маоши 20 минг рублни ташкил этади. Патент ва ижара тўловларидан сўнг, 6 фарзанди билан ҳисоблаганда 7 жон учун 10 минг рубль (155 АҚШ доллари)дан кўпроқ маблағ қолади, холос.

Kun.uz мухбири Ўзбекистонда Г.М.нинг турмуш ўртоғи билан боғланди. У фарзандлари «отам деб келса, уларнинг кўкрагидан итармаслигини, бироқ турмуш ўртоғи билан бирга яшамаслиги»ни билдирди. У хотини айнан ким билан хиёнат қилгани, онаси уни қайтадан уйлантирмоқчи бўлаётганининг сабаби ҳақидаги саволларга жавоб бера олмаслигини айтди.

Худди шунга ўхшаш ачинарли ҳолат бошқа бир ўзбекистонлик аёл билан ҳам рўй берган. Асли Қашқадарёнинг Шаҳрисабз шаҳридан бўлган аёл Сурхондарёнинг Денов туманига келин бўлган ва 12 йил мобайнида бирга турмуш кечирган, узоқ вақт фарзандли бўлмаган. 2014 йили Россияга келгач, катта қизи Москвада, иккинчиси Санкт-Петербургда дунёга келган.

«Москвага келгач, характери ўзгариб қолди. Катта қизим туғилгач, янги йил куни эди, бир аёл қўнғироқ қилиб қолди, дугонасиман деб. Кейинроқ яна бошқа бири қўнғироқ қилди. Икки-уч марта бўлди бунақа ҳолат.

Сўнг Петербургга кетдик. У ерда эрим шаҳарда ишлаётганини важ қилиб 10-20 кун, қўлимга пул бермасдан ташлаб кетадиган бўлди. Болаларим касал бўлиб, унисидан-бунисидан пул излаган вақтларим ҳам бўлган.

Охирги марта келганида уруш-жанжал қилиб, сенлар билан яшамайман, деб нарсаларни олиб чиқиб кетди. Ишлай десам ёш гўдагим бор. Мажбур бўлдим Россиядаги ўзбеклар гуруҳларида хайрия қилдиришга. 14 минг рубль пул тушди, шу билан яшаб келдим, ҳужжат тўғриладим», дейди ўзини М. деб таништирган аёл.

Унинг таъкидлашича, Россияга келиб, бузилиб кетаётган ўзбек оилалари кўп. У оғир шароитда фарзандлари билан қолдириб кетган турмуш ўртоғини кечира олмаслигини айтди.

«Эшитардим, аммо ўзимнинг бошимга ҳам тушади, деб ўйламагандим. Мени шундай ҳолатда ташлаб кетди, қийналиб қолганимда ҳам 100 сўм пул бермаган у. Уни кечиролмайман, чунки ҳайвон ҳам ўз боласини ташлаб кетмайди. Бизни хўрлаб, уриб, ҳар хил гаплар айтиб, ўзга юртда ташлаб кетди. Ўзбекистонда бўлса ҳам майли эди. Кечирмайман ундай одамни», дея кўзларига ёш олади аёл.

Россиядаги ўзбекистонлик муҳожирлар билан суҳбатда бўлганимизда ҳам Россияда Ўзбекистондан оиласи билан келиб, ажралиб кетаётганлар кўплигини айтишди.

P.S.: Айни вақтда Г.М. 6 фарзанди билан Сизранда қолмоқда. Шаҳрисабзлик М.га берилган паспорт ўрнини босувчи ҳужжат муддати 21 декабрда тугаши муносабати билан яхши инсонларнинг кўмагида харид қилинган авиачипта орқали ватанига қайтди. Бугунги кунда, у 2 нафар қизи билан Шаҳрисабзда.

Умид қиламизки, мутасаддилар Г.М. оиласининг ҳам Ўзбекистонга қайтишига, шунингдек М. ҳам доимий иш билан таъминланишига ёрдам кўрсатишади.