Сурияда АҚШнинг 715 млн долларлик қуроли беҳудага йўқотилгани маълум қилинди

АҚШ Суриядаги иттифоқдошларига етказган минглаб дона қурол яроқсиз ҳолга келган ёки ўғирланган бўлиши мумкин. Беҳуда йўқотилган қурол қиймати 715 млн долларга баҳоланган.

Фото: Reuters

Бу ҳақда Пентагон бош нозири ҳисоботига таяниб Military Times нашри хабар берди.

Қуроллар 2017-2018 йилларда Вашингтон томонидан қўллаб-қувватланувчи гуруҳларга ИШИДга қарши курашиш учун етказилган.

Anadolu ахборот агентлигининг хабар беришича, АҚШ қуроли биринчи навбатда Курдистон ишчи партияси учун мўлжалланган бўлган.

Пентагонда таъкидланишича, 4 мингдан кўпроқ қурол, жумладан пулемётлар ва гранатомётлар ҳимояланмаган контейнерларда сақланган ва шу сабабли ундан бир қисмини занг босиб, у яроқсиз ҳолга келган.

Бундан ташқари, қуроллардан бир қисми Вашингтон томонидан қўллаб-қувватланувчи гуруҳларнинг қуролини эгаллаб олган жангарилар қўлига тушган бўлиши мумкин.

Таъкидланишича, Пентагон 2017-2018 йилларда Сурияда ИШИДга қарши курашувчи кучларни қўллаб-қувватлаш учун 930 млн доллар сўраган. Пентагон 2020 йилда Суриядаги иттифоқдошларини қўллаб-қувватлашга 173 млн доллар сарфлашни режалаштирган.