Очилишида Мирзиёев ва Эрдўған қатнашган Анқарадаги Миллат кутубхонасига саёҳат

20 февраль куни Туркия пойтахти Анқарада Туркия республикаси президентининг Миллат кутубхонаси очилди.

Кутубхона очилишига бағишланган тантанали маросимда Ўзбекистон президенти Шавкат Мирзиёев, Ражаб Тоййиб Эрдўған таклифига биноан, ягона олий мартабали меҳмон сифатида иштирок этди ва нутқ сўзлади.

Тантанали маросимни Анқарадан туриб ёритган Kun.uz мухбири Туркия президенти Миллат кутубхонасидан видеолавҳа тайёрлади.

Миллат кутубхонаси дунёдаги энг кўркам ва бой китоб фондига эга кутубхоналардан бири саналади.

Муассаса қурилиши 2015 йилда бошланган эди.

Янги очилган кутубхона фондидан 2 млндан ортиқ босма китоб, 12500 дона босма журналнинг 2 млндан ортиқ сони ўрин олган.

Унда, шунингдек, 550 минг электрон китоб, 6,5 млн электрон илмий ишлар ва 60 мингга яқин электрон журналга оид 120 млнга яқин мақола, ҳисобот ва бошқа маълумотлар мавжуд.

Президент кутубхонаси 11 қаватдан иборат. Бир вақтнинг ўзида 5 минг китобхонни қабул қилиш қувватига эга.

Кутубхонанинг энг катта «Жаҳоннома» залида 16 та устун бор. Бу – 16 та туркий халқларнинг рамзий маъносини билдиради.

Бу зал қуббасида Алақ сурасининг 4- ва 5-оятларининг туркча тафсифи битилган: «У қалам билан илм ўргатгандир. У инсонга билмаган нарсаларини билдирди».

Кутубхонанинг 6-қаватида 408 кишилик овқатланиш жойи, 74 кишилик ширинликлар кафеси ва дам олиш ҳудуди жойлашган.

Бу қаватда 2 та йиғилишлар зали ҳам бор.

Ўқиш залларида фойдаланувчилар телефонда гаплашишлари, чой ва кофе ичишлари ҳамда суҳбатлашишлари мумкин бўлган 8 та дам олиш бўлими ҳозирланган.

Кутубхонанинг 1699 м.кв. майдонда жойлашган нодир асарлар бўлими бир вақтнинг ўзида 226 китобхонга хизмат кўрсата олади.

Бу ерда 50 мингга яқин нодир асарлар ва уларнинг электрон версиялари сақланади.

Кутубхонада 24 та тренинг хоналари ва синфлар мавжуд бўлиб, бу синфлар 328 киши учун мўлжалланган.

Кутубхонада тадқиқотлар бўлими ҳам бор ва у 3862 м.кв. майдонда, 630 кишилик сиғимга эга. Бўлимда 20 мингдан ортиқ илмий китоблар ўрин олган.

Конференциялар зали 897 м.кв. майдонда жойлашган бўлиб, 500 кишига мўлжалланган.

Салжуқийлар номли кўргазма ва музей залида турли даврларга оид кўргазмалар ташкил этилади.

Кутубхона очилишида нутқ сўзлаган Ражаб Тоййиб Эрдўғаннинг айтишича, бу кутубхонада китобхонларга ҳар куни, 24 соат мобайнида хизмат кўрсатилади.

Шунингдек, китобхонларга чой, кофе каби ичимликлар, симит ва кек ширинликлари бепул тақдим этилади.