Равшан Алимов: Иқтисодий дипломатия самарадорлиги ўта паст

Унда Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Равшанбек Алимов сўзга чиқди. У ўз нутқида ташқи ишлар соҳасидаги муаммоларга тўхталди. 

“Иқтисодий дипломатия самарадорлиги ўта паст. Ташқи ишлар вазирлиги ҳисоботига кўра республиканинг хориждаги дипломатик ваколатхоналари томонидан ўтган йили 1200дан ортиқ бизнес-форумлар, 3700дан ортиқ ўзаро ташрифлар ўтказилди. Аммо уларнинг амалий натижаси деярли йўқ. Ҳар холда бундай маълумотлар келтирилмаган. Маълумки айрим ҳолларда тадбирлар номига ва самарасиз ўтказилмоқда”, - деди Равшан Алимов.

Унинг таъкидича, инвестицияларни жалб этиш мақсадида ўтказилган тадбирларнинг таҳлили уларни ташкил қилишда батамом янги ёндашувлар лозимлигини кўрсатмоқда. 

 “Афсуски, турли инвестицион конференциялар кўпинчалик юзаки ташкил этилмоқда, уларнинг натижадорлиги паст, ваҳоланки улар учун муайян миқдорда маблағлар сарфланади. Қатнашувчиларнинг миқдорий кўрсаткичларга урғу бериб келинмоқда. Ваҳоланки, замонавий тажриба мақсадли “таргетлаш”, яъни лойиҳага бевосита алоқадор 15-20та иштирокчилар билан аниқ музокара афзаллигини исботламоқда”, - деди Равшан Алимов.