Фоторепортаж: Суриялик аёллар, болалар ва чақалоқлар Европа томон интилмоқда

Муҳожирлар бир неча кундирки, Туркиянинг қочқинларни тўхтатиб турмаслик қарори ортидан Эдирнеда – Пазаркуле чегара дарвозасида кутишмоқда. Сўнгги кунларда минглаб муҳожирлар далаларни босиб ўтиб чегарага етиб келган.

Аросат майдонида кутишдан чарчаган муҳожирлар нарвонлар ёрдамида тиконли симлардан ўтиб, Грецияга йўл олишмоқда. Аскарлар қочоқлар кесган сим тўсиқларни таъмирлашга мажбур бўлишди. Қочқинларнинг айримлари Истанбулга қайтишган.

Ораларида аёллар, болалар, чақалоқлар бўлган қочқинлар машаққатли кунларни бошдан кечираётган онларда улар томон улоқтирилган газли гранаталари Туркия чегарасидаги ҳудудга ҳам таъсир қилмоқда.

Бунга жавобан турк аскарлари огоҳлантириш ўқларини узишган.

Буфер зона ва чегарадаги қочқинларнинг умид билан кутиш онлари давом этмоқда.

Сулаймон Сойлу: Қочоқлар сони 100 мингга етди

Туркия Ички ишлар вазири Сулаймон Сойлу твиттер саҳифасида Эдирне орқали Туркиядан чиқиб кетган қочоқлар сони 100 минг 577 нафарга етганини маълум қилди.

Европа хавотирда

Грециянинг Кастанес чегара дарвозаси олдида минглаб муҳожирлар тўпланиб қолгани сабабли мамлакатнинг барча чегара ҳудудларида хавфсизлик чоралари кучайтирилди. Ҳукумат матбуот котиби Стелёс Петсас чегарани кесиб ўтган 66 муҳожир ушланганини маълум қилди.

«Кеча 4000дан ортиқ муҳожирнинг уюшган шаклда чегарани кесиб ўтишининг олди олинди», деди Петсас.

Греция Ташқи ишлар вазирлиги ноқонуний йўллар орқали мамлакатга кириш ҳаракатларининг олдини олиш учун Европа Иттифоқи ташқи сиёсат кенгашининг зудлик билан чақирилишини талаб қилган.