Тиббиёт қўлқоплари бир марталик ва уларни қайтадан ишлатиш мумкин эмас - Отабеков

Бугун, 27 март куни АОКА қошидаги махсус штабда ташкил этилган онлайн брифингда Санитария-эпидемиология назорати давлат инспекцияси раҳбари Нурмат Отабеков  бозорлардаги санитария-эпидемиологик назорат ҳақида маълумот берди. 

Нурмат Отабековнинг қайд этишича, ҳозир, айниқса, озиқ-овқат бозорларида карантин чеклов тадбирларига риоя этишни назорат этиш бўйича алоҳида кўрсатма берилган. Агар ким карантин қоидаларини бузган бўлса, уларга, албатта, чора кўрилади. 

«Бироқ бир нарсани унутмаслик керак: бозорларда СЭС ходими деган штат бирлиги йўқ.  Бу ҳар бир қонун бузиш истагида бўлган шахснинг тепасида санитария-эпидемиология ходимлари назорат қилиб туришининг имкони йўқлигини англатади. Шунинг учун ўз-ўзимизни, бир-биримизни назорат қилишни кучайтиришимиз керак», - деди Нурмат Отабеков. 

Шунингдек, Нурмат Отабеков фуқароларни бозорларда карантин қоидалари бузилаётганига  гувоҳ бўлишса, ўша ерда фаолият юритадиган ички ишлар ходимлари ёки санитария-эпидемиология маркази ходимлари, санитария-эпидемиология осойишталик агентлиги тизимидаги муассасаларга мурожаат қилишга ва бу орқали қонунбузар устидан чора кўришга эришишга чақирди. 

Бундан ташқари, Нурмат Отабеков тиббиёт қўлқопларини неча марта ишлатиш мумкинлиги тўғрисидаги саволларга ҳам жавоб берди. 

Тиббиёт қўлқоплари бир марталик ва уларни ювиб қайтадан ишлатиш мумкин эмас. 

Лекин ошхоналарда ишлатиладиган хўжалик қўлқоплари ҳам мавжуд бўлиб, уларга махсус резина ишлатилган, қалин ва дағал бўлади. Мана шундай хўжалик қўлқопларини ювиб қайтадан ишлатиш мумкин, тиббиёт қўлқопларини эса бир марта ишлатгандан сўнг ташлаб юбориш керак», - дея маълумот берди  Санитария-эпидемиология назорати давлат инспекцияси раҳбари.