Токио Олимпиадаси кўчириладиган эҳтимолий сана маълум қилинди

Коронавирус пандемияси сабабли қолдирилган 2020 йилги Токио Олимпиадаси 2021 йил 23 июлда бошланиши мумкин. Халқаро Олимпия қўмитаси бу масала бўйича якуний қарорга аввал маълум қилингандек 3 ҳафта ичида эмас, балки анча эртароқ келиши мумкин.

Фото: Rodrigo Reyes Marin / AFLO / Global Look Press

Бу ҳақда вазиятдан хабардор манбага таяниб New York Times нашри хабар берди.

27 март куни Kyodo ахборот агентлиги Олимпиаданинг янги ўтказилиш санаси 3 ҳафта ичида қабул қилинишини маълум қилганди. Бироқ, манбанинг хабар беришича, ХОҚ Олимпиада ўтказиладиган санани эртароқ эълон қилмоқчи. Қўмитанинг бу масала бўйича тезкор йиғилиши 29 мартда бўлиб ўтиши кутилмоқда.

Токио Олимпиадаси 2020 йил 24 июлдан 9 августигача бўлиб ўтиши керак эди. Бироқ 24 март куни ХОҚ Ўйинлар коронавирус пандемияси сабабли 2021 йилга кўчирилишини эълон қилди.