Зеленский Украинада коронавирус билан боғлиқ вазият қандай тус олиши мумкинлигини айтди

Унинг фикрича, биринчи сценарий бир вақтда аҳолининг 3-5 фоизи вирусдан касалланишини кўзда тутади.

“Бу аянчли рақамлардир. Бироқ бундай сценарий фалокатли ҳисобланмайди. Шу сабабли биз тийрак ва интизомли бўлишимиз керак: карантинда қолишимиз, гигиена қоидаларига риоя қилишимиз ва заруратсиз кўчага чиқмаслигимиз лозим. Ўшанда биз бу бўҳрондан ўтиб оламиз”, деб таъкидлаб ўтган Украина президенти.  

2-вариантда касалланиш 25 фоизни ташкил қилади. 3-сценарийда эса бир вақтда 50 фоиз аҳоли касалланади. Зеленскийнинг таъкидлашича, мамлакат соғлиқни сақлаш тизими 2- ва 3-сценарийлар ривожлангудек бўлса, уларга дош беролмайди. 

Украина президенти ҳамюртларини карантин таътилни ва кабобхўрлик қилишни англатмаслигини, илиқ ҳаво ва пляжлар эса ҳаёт ва соғлиққа хавф бўлмаслиги кераклигини тушунишга чақирган.

25 март куни Украинада коронавирус тарқалишига қарши чора сифатида фавқулодда вазият режими киритилган. Ушбу режим 24 апрелгача амал қилади. Айни вақтда мамлакатда коронавирусга чалинганлар сони 475 нафарни, вафот этганлар сони 10 нафарни ташкил қилмоқда.