Франция иқтисодиёти иккинчи жаҳон урушидан кейинги энг катта йўқотишга учраши айтилди

Франция иқтисодиёти жорий йилда жуда катта йўқотишга учрайди. Бу ҳақда мамлакат молия вазири Брюно Ле Мэр маълум қилди. Вазирнинг айтишича, 2020 йил зарар 2009 йилда юз берган жаҳон иқтисодий инқирози давридагидан ҳам каттароқ бўлади. Бу Франция тарихидаги иккинчи жаҳон урушидан кейинги энг катта йиллик йўқотиш бўлади.

Фото: Reuters

«Йил охирида иқтисодиётимиз кўрсаткичи 2009 йилда содир бўлган энг ёмон натижадан ҳам 2,2 фоиз пастроқ бўлади. Бу биз иккинчи жаҳон урушидан кейин дуч келадиган энг ёмон иқтисодий қулаш бўлади», деди Ле Мэр Сенатда қилган чиқишида.

Франция ҳукумати март ойида ўтказган шошилинч йиғилишида жорий йилда мамлакат иқтисодиёти 1 фоизга пасайиши мумкинлиги айтилганди, аммо коронавирус тарқалиши тезлашгандан кейинги ҳисоб-китоблар зарар кутилганидан анча катта бўлишини кўрсатди.

Тайёрлаган Ўткир Жалолхонов

#Франция #иқтисодиёт

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.